ALAS sayis sa buntag. Kasagaran maoy imata ni Amante. Mibangon siya.
Miadto sa banyo kay maligo. Dili maabli ang pultahan sa pansayan sa pagduot niya. Gitrangkahan sa sulod.
Manuktok unta siya aron pagsuta kon may tawo ba gyud sa sulod.
“Aarrgghh! Orrgghh! Warrkk!” Nabati niya ang tingog gikan sa sulod.
Nagsuka na sab si Marita sa sulod.
Ikatulo na ni nga buntag nga di dayon makagamit si Amante sa banyo, kay nakauna og gamit si Marita.
Ug ikatulo ni nga buntag nga nagsuka siya.
Nagduda na si Amante nga mabdos si Marita nga nag-edad og disi-utso anyos, ilong-tuwapos, ug ig-agaw ni Amante.
Gisagop si Marita sa Mama Nida ni Amante nga dugay nang nabiyuda.
Nagkinahanglan ang iyang inahan og babaye nga masugo-sugo sa balay, kay si Amante nga bugtong anak niini ulitawo ug magtutudlo nga wala sa balay tibuok adlaw.
Sabado ug Dominggo ra naa siya sa balay kay way trabaho. Way kauban iyang mama nga hinay nag lihok kay tiguwang na.
Usa ka tuig na nga nagpuyo uban nila si Marita dihang may nitubo nga bugon sa tuong paa ni Marita, duol gyud sa bugan.
Gitambagan siya ni Nida nga ipatan-aw kinig albularyo. Sa silingang baryo, may albularyo nga nabaniog nga maayong mananambal.
Gikan sa Mindanao si Jacinto nga singkuwenta anyos na ug biyudo.
Gikuyogan ni Nida si Marita ngadto sa balay sa albularyo.
Apan naulaw si Marita nga mopukas sa iyang sayal kay daghan ang pasyente.
“Kay maulaw man ka mobukas sa imong sayal kay daghan pang pasyente nga naghuwat, balik lang unyang gabii aron ikaw ray pasyente,” matod ni Jacinto nga nagpasiklap sa hamis ug puti nga paa sa dalaga.
Sa Martes ug Biyernes sa gabii, maoy iadto ni Marita sa balay ni Jacinto.
Wa na mokuyog si Nida kay nakatultol na man ang dalaga.
Apan paglabay sa pipila ka adlaw, nahibulong si Amante kay hapit kada gabii na man magpatambal si Marita sa iyang bugon sa bugan.
Unya dangtan og tulo ka bulan nagsuka-suka na.
“Ipatan-aw nag doktor imong pagsuka-suka, Rita,” sugyot ni Amante dihang migawas na sa banyo ang dalaga.
Nabatyagan ni Amante nga nangluspad kini. Unya namahid sa mga ngabil kay pilit ang laway.
Wa motingog si Marita nga midalig sulod sa iyang lawak, daw naulaw kang Amante.
Nianang pagka gabii, nangita si Nida sa dalaga. Lawom nang gabii apan wala pa nahiuli si Marita.
“Unsay iyang pananghid nimo, Ma?” ni Amante nga diha maglingkod sa sopa tupad sa iyang inahan sa sala samtang nagtan-aw og telenobela.
“Moadto siya sa albularyo aron patambalan ang bugon kay wa pa man maalim,” ni Nida.
“Ana, Ma! Kuyaw nga di na mopauli si Rita!” ni Amante.
“Ha? Ngano man?”
“Nagkauyab tingali ang tambalan ug ang tinambalan!” ni Amante.
“Siyaro!” Naiknat ang kilay ni Nida.
Wa na gyud mahiuli si Marita. Pagka sunod adlaw sayo nga gisugo ni Nida si Amante aron moadto sa balay sa albularyo.
Pag-abot ni Amante didto sirado ang balay, way tawo. Nakapanghupaw si Amante.
Segurado siya nga nagtabanay si Marita ug si Jacinto. Naamong sa bugon sa bugan. (Katapusan)