Dili tiaw ang kalisod nga naagian ni Regine Godinez-Itumay pipila ka adlaw sa wala pa matawo ang bata nga diha sa iyang sabakan.
Nisaka ang iyang blood pressure ug nag-bleeding usab siya sa wala pa manganak.
Unang higayon kini niya nga pagmabdos uban sa iyang bana nga si Ariel Itumay.
Sa wala pa manganak si Regine, nagsagol ang ilang gibati ni Ariel dihang sila nahibawo nga nagsabak diay siya.
Matod ni Ariel, nihilak ang iyang Nanay Jenny, iyang inahan, dihang ilang gipahibawo ni Regine nga ang naulahi nagsabak sa ilang unang liwat.
“Nihilak gani si Nanay. Akong giingnan sige lang, blessing man ni siya,” sugilon ni Ariel.
Niadtong Septiyembre 11, 2021, gihimugso ni Regine ang usa ka bata nga lalake pinaagi sa Caesarean section sa Cebu Velez General Hospital sa siyudad sa Sugbo.
Apan nahabilin ang bata og usa ka semana kay nakakaon og hugaw samtang diha pa sud sa tiyan sa iyang inahan.
Maayo na lang luwas ang bata ug himsog ang lawas.
Niadtong Disyembre 8, 2021, atol sa kapistahan sa Immaculada Concepcion, gibunyagan ang bata sa chapel sud sa PC Hills compound.
Ang bata ilang ginganlan og Zian Azriel Itumay. Ang Zian gikuha gikan sa pangan nga Zayn Malik, kanhi miyembro sa boyband nga One Direction nga giusab lang ang spelling samtang ang Azriel nagpasabot nga “God is my help”, matod ni Ariel.
Alang nila Ariel ug Regine, dili mahulagway ang tumang kalipay sa pag-abot ni Zian Azriel sa ilang kinabuhi.