Matag usa kanato, aduna gyuy barkada o grupo sa mga higala nga atong masandigan o masaligan ilabi na panahon sa problema.
Sama kini sa sugilanon sa panaghigalaay sa grupong Drunken Masters sa Barangay Bakilid, siyudad sa Mandaue.
Dali nga giklaro ni Marites Jumawan, usa sa mga miyembro sa grupo, nga dili sila palahubog. Kini lang ang napili nga pangan sa grupo kay nindot paminawon alang nila.
Matod ni Jumawan, panahon nga dunay manginahanglan sa ilang grupo, magtampotampo sila nga mga miyembro aron kini maayudahan.
Gani, dihang gisugdan ang pagpatuman sa lockdown sa Sugbo sa miaging tuig, gipanghatagan sa grupo ang ilang mga kamiyembro og bugas ug groceries.
“Tampo-tampohan namo mga kagrupo. Ingon ana among grupo. Nagkahiusa sad mi kanang naay mga medical mission, motabang sad mi,” dugang ni Jumawan.
Kagahapon, Agusto 28, gisaulog sa grupo ang ilang ika-3 nga anibersaryo.
Tungod sa higpit nga restrictions, naglikay lang una ang grupo nga magtapok. (SCG)