NOBIYEMBRE 2013 dihang unang nagkatagbo ang dalan nila ni Astra Zina “Kling-Kling” Logarta ug Anecito “Chito” Geverola sa newsroom sa Cebu Catholic Television Network (CCTN).
Si Dennes Tabar, news manager sa CCTN, ang nagpailaila sa duha.
Si Chito, 25, lumad taga lungsod sa Argao, nadestino sa editing department sa CCTN hangtod nga nahimong cameraman samtang si Kling-Kling, 28, taga lungsod sa Consolacion, regular nga tigbalita sa sibyaanang Radio Mindanao Network (RMN) dyHP, correspondent usab sa CCTN.
Human sila magkaila, ang wala mahibaw-i sa kadaghanan, nagsige na ang ilang komunikasyon pinaagi sa text messaging ug chatting sa Messenger sa Facebook.
Ang wala usab mahibaw-i sa uban kay nagsige na sila og kita.
Sila nahimong managhigugmaay besperas sa Pasko niadtong 2013.
“Dali ra kaayo mi nag-click sa each other,” paambit ni Kling-Kling, kinsa correspondent usab sa Superbalita Cebu.
Ang naganahan ni Kling-Kling kang Chito kay una, Diyosnon kini ug maampuon ug kanunay sentro ang Ginuo sa ilang kinabuhi ug relasyon.
Iya usab gihulagway si Chito nga responsabli, matinabangon sa pamilya, maayo mokupot og kwarta diin siya nakat-on nga mopundar sa negosyo ug mapinanggaon sa iyang pamilya ug mga higala.
Sumala ni Chito dali sila nagkasinabot kay pareho sila og mga plano, tumong ug panglantaw sa kinabuhi.
“Kana ganing individual pa mi naghunahuna ug nagplano pero kon i-share na namo sa usag-usa, pareho diay,” dugang niini.
Bisan kon wala pa sila magminyo, giusa na nila ang ilang kwarta aron ibuhi og baka ug mga baboy.
Ang tipik sa kita sa ilang gamay nga negosyo nakatampo sa pagpangandam sa ilang kasal.
Niadtong Mayo 16, 2018, gihiusa ang duha sa salag sa kaminyuon sa St. Joseph Husband of Mary Parish sa Barangay Tayud, Consolacion.
Sa seremonyas, si Padre Kent Dahrel Galo, ni-officiate sa kasal, nipahinumdom sa bag-ong magtiayon nga ang duha nabugkos sa gugma ug kanunay ibutang sa sentro sa ilang kinabuhi ang Ginuo labi na sa mga desisyon nga himuon.
Niabag usab sa seremonya sila si Padre Ricardo Cañete ug Padre Daboy Vega.
Apil sa entourage sa kasal sila si Kathleen Cinco, maid of honor; John Rick Malalay, best man; groom’s men sila si John Mike Geverola, Jose Gregy Magdadaro, John Mark Camarillo, Dexter Paran samtang bride’s maids sila si Raquel Bautista, Jellie Ann Alterado, Kesha Ann Fernandez, Le Phylis Antojado. (SCG)