NAG-viral ang The Aida Patana Show tungod sa gipanghatag niining cash prizes nga dakong tabang labi na sa mga kabus nga maoy pinakaapektado karon sa krisis sa Covid-19.
Ang maong digital entertainment program makita matag-alas 9 sa gabii sa Facebook Live ni Ms. Aida Patana, ang CEO ug managing proprietor sa M-Talent Events and Promotions nga maoy No. 1 supplier karon sa mga sikat nga artista sa Visayas ug Mindanao.
Matod ni Patana sa interbyu sa Superbalita Laysho nga ang tumong ug tuyo sa iyang show aron makatabang ug makahatag og bisan gamay nga alibyo ning panahon nga naka-quarantine ang tanan sa ilang mga panimalay.
Ang The Aida Patana Show nagsugod pila ka adlaw human gipaubos sa enhanced community quarantine ang Sugbo tungod sa Covid-19 outbreak.
Niadtong Lunes naka-30,000 likes ug comments na ang maong show gikan sa mga netizen nga namasin mapiksan og mga linibong cash nga ma-claim sa bisan asang branches sa Numero Unong money transfer ng bayan, ang ML Kuwarta Padala.
Ug kay birthday sa iyang kinamanghuran, ang cute nga kaluhang Sheina ug Sheila nga mag-21 anyos karong adlawa, Huwebes Santo, Abril 9, matod ni Patana nga dili lang 10 kundi 20 ka mga netizen ang ilang panghatagan og tag-P1,000 cash.
“Atangi ang among Facebook live karong alas 8 sa gabii aron makabalo mo unsaon pagdaug,” dugang pa sa 46-anyos nga single mom nga naila usab isip labing unang Cebuana nga nidaug sa 2019 Mrs. Philippines World isip first runner-up.
Aida “Angging” Patana, Ssssuper ka!
Unsay format sa imong show?
It’s about showbiz, events and game show. Pareho sa akong program sa Energy FM every Saturday.
Nag-expect ka nga mag-viral?
Wala gyud. Diha ra ko naka-realized sa ilang mga comment kon unsa kadaghan sa naglisud karon. Nagsakit akong dughan naghunahuna. Nakahilak ko. Naluoy ko sa ilang mga sitwasyon.
Nanghatag sad kag relief goods?
Cash ra tanan sa online show. Ang relief goods gihatag nako sa mga frontliner. Nagpakaon sad mi sa 500 ka mga military. Happy kaayo ko nga nakatabang bisan sa ginagmay lang nga paagi.
Kaugalingon nimo ning kuwarta?
Ang uban pero duna sad koy mga sponsor. Siyempre usa ana ang akong mentor nga si Nyorito (Michel Lhuillier) nga grabe ang suporta isip tabang sad niya sa mga apektado karon sa krisis.
Di ba dunay 8th Anniversary Party ang M-Talent Events and Promotions sa Waterfront Hotel?
Supposedly karong May 16 pero i-postpone una nako hangtod nga dili pa ta mobalik sa normal.
Okay ra nimo i-extend pa ang quarantine period?
Kon unsay makaayo nato. Mag-agad lang ta sa atong mga lider kay mas nasayud sila sa sitwasyon. Basta ako motabang ko kutob sa akong makaya. Ako gani ako rang usang nagbuhi sa akong lima ka mga anak. Pero nakaya ra man. Basta duna kay pagsalig sa Ginoo. Way imposible.