ANG nasod sa Thailand nabantog sa ilang mga lamiang pagkaon. Di kompleto ang pagbisita nimo dinhi kon di ka mag-food trip.
Sa pagbisita nako isip reporter sa Superbalita Cebu didto sa Bangkok, ang capital city sa Thailand, niadtong Abril, gisuwayan nako ang ilang mga tinuod nga lutong Thai ug ang mga street food.
Didto sa Khao San Road, nakuryuso ko sa dihang nakakita ko og gamay nga stall sa pagkaon nga adunay mga exotic food.
Huh? Unsa ni?
Piniritong baki, dagkong kaka ug tanga (scorpion), gangis, ulod, apan-apan (grasshopper), timos ug ubang mga insekto ang gibaligya niini.
Ang mga dagkong scorpion ug kaka (tarantula) gibaligya sa tag 100baht (mga P165) matag usa.
Mahal kini kon itandi sa mga gagmayng insekto tungod kay mas lisod man kining dakpon, sumala pa sa tigbaligya.
Samtang 100baht sab ang gisagol nga mga gagmayng insekto nga gangis, ulod, apan-apan, baki ug uban pa.
Giunsa og luto?
Matod sa namaligya, di hugaw ang iyang mga gipamaligya nga exotic food.
Gihugasan ug gilimpyohan og maayo ang mga mananap usa kini gi-deep fry sa nagbukalbukal nga mantika.
Unya na niya timplahan, butangan og asin, ubang mga rekado ug lamas ang iyang mga insekto human sa pagprito.
Unsay lami? Gipili nako ang gipalit ang balig 100baht nga saksak-sinagol nga mga insekto.
Unsay lami?
Kung akong ihulagway ang lasa sa akong nasuwayan (base sa akong nahinumduman): ang mga gipritong baki susama sa danggit nga buwad ang lasa; ang ubang mga insekto sama sa apan-apan ug gangis, susama sa potato chips ang kalami.
Way baho ang mga insekto kon imo kining ihungit apan mas maayo nga imo dayong kan-on inig palit kay init pa. Lami kini paresan og beer.
Kung ikaw lud-anon ug magsuka kung motilaw, mahimo ra kang motan-aw sa display.
Apan kun buot kang mokuha og hulagway o video sa display tungod kay di kini libre, kinahanglan kang mobayad og 10baht (mga P17).