Tungod sa memorable experience sa pamilya ni Memee Plaza Valiente-Paquibot nga iyang gihulagway nga ‘buyog nga laagan’ sa ilang pagpanuroy sa usa ka dapit sa habagatang bahin sa Sugbo nga naghatag og talagsaong ambience, nakahukom sila nga mogama sab og suroyanan nga maghatag og adventure ug unique experience ngadto sa ilang mga guest.
Gipa ilaila ni Memee ang Airpaqs Cottages Grill and Restaurant nga nahimutang sa Barangay Tingo Libertad, isla sa Olango, Lapu-Lapu nga natukod niadtong Hulyo 2021.
“So instead of having the place just for ourselves we concluded to make it to business,” matod pa ni Memee sa dihang nahinabi ning nagsuwat.
Matod pa nga way plano ang iyang pamilya nga mohimo sa maong negusyo tungod kay ang ilang property nga ilang gitukoran og mga payag alang lang sa ilang pamilya sa higayon nga buot nilang mopahuway sa isla.
Tug-an ni Memee nga ang ngalan nga Airpaqs diin gikuha ang pulong nga ‘air’ tungod kay adunay gi-idolo nga basketbolista ang iyang kapikas o ang sports nga basketball. Perfect sab nga description ang ‘air’ kay open ug native ang concept niini.
Samtang ang ‘paqs’ gikan sa ilang apelyido nga Paquibot.
UNSAY NAA?
Sa kadtong buot mosuway dili mo ma-bored tungod kay hapit naa na tanan ang inyong gipangita nga amenities.
Sa ilang air condition nga accommodations ania ang mosunod:
Nipa hut villa, P3,600 ang gabii nga haom sa unom ka tawo
Family room nga good for six, P3,600
Barkada room perfect sa 10 ka tawo, P6,000
Aduna sab silay non-aircon rooms sama sa:
Good for 2 nga nipa hut, P1,000
Bahay kubo good for 3, P1,500
Gazebo nga gilibutan og kurtina, good for 2, P900.
Adunay swimming pool sa gilawmon nga 2 – 6 feet, Balinese hammock/duyan, shared shower, toilet & bath, kawa hot bath (adunay dugang charge) ug restaurant.
UNSAON PAG-ADTO?
Manukad sa Hilton Port, Barangay Punta Engaño, mainland Lapu-Lapu sakay og pumpboat nga anaa sa P45 ang regular nga pletehan matag pasahero nga su’d sa 10 – 15 minutos ang biyahe.
Sa pagdunggo sa Sta. Rosa Port, Olango sakay og traysikol paingon sa Airpaqs, Tingo sa tag-P40 ang plete matag pasahero.
Alang sa dugang pangutana, mamahimong moduaw sa ilang official Facebook page.
Manglabang na ta sa Olango ug suroyon ta ang Airpaqs!