KON maghisgot na gani ta og China, automatic nga mosulod sa atong alimpatakan ang iconic / historical structure sa maong nasud ang Great Wall.
Dili kaayo nato hisgutan ang kasaysayan sa Great Wall kay kuwangon ning atong pahina kon subayon pa nato ang history, apan akong isaysay kaninyo ang dili makalimtan nako nga Great Wall experience sa akong pagduaw sa maong dapit niadtong miaging semana.
Aniay pipila lang ka mga butang nga angay mahibaw-an sa kadtong naglaraw nga mosuroy sa maong dapit.
Kuyog sa akong mga kauban nanukad mi sa Beijing kay lage usa sa among target nga motaak sa Great Wall.
Ang Mutianyu Great Wall kapin sa usa ka oras biyahi-on gikan sa Beijing City proper.
Mao kini ang usa sa na-preserve nga bahin sa Great Wall ug sagad sa tour anaa diri naka-focus tungod sa options niini kon mosaka ka sa maong sikat nga tourist attraction.
Gi-book namo ang among Great Wall experience pinaagi sa Klook (booking app).
Akong tip para sulit ang inyong pagpanuroy paggahin og usa ka adlaw alang sa inyong Great Wall experience ug sugdi kini sayo sa buntag aron ma-enjoy ninyo.
Aduna’y upat ka choices ang mamahimo nimong mabuhat pagsaka sa Mutianyu Great Wall.
Una mao ang pagsakay og cable car pasaka, ikaduha mao ang pagsaka o ang pagkatkat niini pinaagi sa pag-hike, ikatulo ang pagsaka gamit ang chairlift.
Kon batan-on ka ug ganahan og lingaw nga experience, suwayi ang chairlift niya slide panaog gamit ang Toboggan.
Dihang nibisita me sa Mutianyu Great Wall, uwahing semana kini sa Nobiyembre ug tugnaw na ug dili kaayo daghan ang tawo o turista, dili sama sa ubang buwan nga dasok sa mga tawo ang moduaw.
Best season nga mobisita sa Great Wall ang panahon sa Spring ug Autumn.
Adunay 20 ka towers nga mamahimong mabisita sa Mutianyu Great Wall.
Apan ang maanindot nga view anaa sa Tower 14 hangtod Tower 20.
Daghang instagrammable spot usab ang maong mga towers diin magtagbaw mo sa pagkuha og mga hulagway o selfie / groufie.
Angayang hinumduman
• Adunay gitas-on nga 5,400 meters ang Mutianyu Great Wall
• Abli kini gikan alas 7:30 sa buntag hangtod alas 5 sa hapon.
• Ang Great Wall ang labing dakong estraktura sa kalibutan nga makita sa outerspace.
Schedules
7:40AM - 8:00AM Call Time
8:00AM - 10:00AM Travel to Mutianyu Great Wall
10:00AM - 10:30AM Briefing with English speaking tour guide
10:30AM - 2:00PM Tour Great Wall
2:00PM - 3:00PM Lunch
3:00PM - 5:00PM Back to Beijing City Proper
* Gibana-bana nga anaa sa duha ka oras ang average nga pag-tour sa Great Wall gikan sa Tower 14 ngadto sa Tower 20.
Expenses
A. Tour - P1500 (Klook) with lunch
B. Cable Car - P900 (pasaka ug pabalik) Katunga ang presyo sa mga bata
C. Chairlift/Toboggan - P900 (Pasaka ug panaog) Katunga ang presyo sa bata. /