Ang Valencia usa ka malinawon nga lungsod duol sa Dumaguete City, Negros Oriental nga puno sa katahum ug kinaiyahan.
Sa mubo nga pagpaila sa Valencia, kon kamo makahigayon sa pagsuroy sa maong lungsod, maayo sa mga buwan sa Hulyo ngadto sa Agusto kay maoy tiempo kun season sa mga prutas, sama sa lansones, rambutan, durian ug marang.
Gawas nga abunda ang maong mga prutas nga mapalit sa kamerkaduhan, makita sab nga naglumbay ang mga fruit stall daplin sa kalsada.
Kini nga mga prutas dili lang tam-is ug lamian, nagpaila lang nga tabunok ang yuta sa Valencia ug kakugi sa mga tawo o nananom niini.
SUROYANAN
Kon naa ka sa Valencia, ayaw og sipyata sa pagsuroy ang Pulangbato Falls diin inyong makita ang kaanyag sa kinaiyahan, ang pagdagayday sa tin-aw nga tubig gikan sa ilawom nga pula nga mga bato.
Ang ngalan nga ‘Pulangbato’ naghulagway sa talagsaon nga pula nga mga bato nga makita tungod sa presensiya sa suflur.
Gawas niini nga busay, ang kasikbit nga Red Rock Hot Spring perpekto alang sa gusto sa usa ka mainit ug makapakalma nga kaliguanan.
Anaa usab ang Casaroro Falls, laing natural nga katahum, diin mapalibutan ka sa mga tingog ug talan-awon sa kinaiyahan.
Ang Mt. Talinis maoy laing mutya sa Valencia diin ang tumoy nga bahin niini masalipdan na sa gabon o ba kaha mga panganod.
Kini nga bukid dili lang aron tan-awon, daghang mga adventure-seeker ang nagbaktas sa mga trails niini.
Sa imong pagsaka, makakita ka og lainlaing mga tanom, makadungog sa mga langgam nga nanag-awit, ug kon makaabot ka sa ibabaw, ikaw gantihan sa usa ka talan-awon nga makahingangha.
Magtagbaw ka’g kuha og hulagway sa kanindot sa kinaiyahan.
Unya, anaa ang Tierra Alta, istruktura nga gipintalan og puti ug asol, sama sa matahum nga mga balay nga makita sa Greece.
Ang parola sa Tierra Alta perpekto alang sa mga mahiligon nga magpahulagway ug sa imong pagsuroysuroy nga bation ka’g kauhaw ug kagutom ang Tierra Café maoy sulbad.
Kini nga dapit dili lamang alang sa pagsuroysuroy, perpekto usab kini alang sa espesyal nga mga okasyon sama sa kasal, birthday parties, ug uban pa.
Sa laktod, ang Valencia labaw pa sa usa ka lungsod: Kini usa ka kasinatian nga naghulat aron maadto. Ganahan ka sa kinaiyahan, pagkaon, o adventure, ang Valencia adunay ikatanyag sa mga dumuduong.