Alang sa kasayuran sa kadaghanan nga ang dakbayan sa Sugbo gawas nga first class highly urbanized city sa Central Visayas nga adunay 80 ka barangays, gilangkuban usab kini og 70 porsiyento nga kabukiran.
Sa bukirang bahin sa siyudad, adunay pipila ka mga dapit nga daw nagpahipi sa kanindot nga haom kasuroyan. Adunay uban nga wa pa madiskubrehi sa pipila.
MI CASA
Laing dapit nga akong nasuroyan sa akong kalaagan mao ang Mi Casa: Garden, Campsites nga nahimutang sa Sityo Gaang, Barangay Paril, bukirang bahin sa Dakbayan sa Sugbo.
Gibana-bana nga molanat og tunga sa oras nga biyahe kon manukad sa Barangay Talamban.
Ang Mi Casa Garden haom kaayo nga dangpanan alang niadtong gustong mag chill-chill kuyog sa inyong forever, mga higala o sakop sa pamilya ilabi na nga mamahimo sab nga maka-overnight stay sa maong lugar.
Di sab kini layo sa city proper sukwahi sa ubang mountain resort nga mokaon og dakong oras sa pagbiyahe.
AMENITIES
Wa ray bayad kon mosuroy sa lugar nga di mo-avail sa ilang amenities.
Ang Mi Casa nga usa sab ka campsite mahimong dad-an og tent sa mas mopili nga mag-camping.
Sa kadtong gusto og hamugaway sa ilang pagpahuway, adunay Teepee Huts nga kaabangan nga may libre nang breakfast.
Kadtong gusto og tapok panahon sa kagabhion, adunay bonfire nga maghatag og kainit sa kabugnaw sa dapit.
BOOKING
Akong tambag nga mas maayo ngadto sa ilang official nga Facebook Page mohimo sa inyong booking aron masiguro kon aduna pa bay bakante o available nga tents o accommodations.
Sa kadtong mosubra sa duha ka tawo o base sa gitugot nga gidaghanon nga guests, mamahimong maka-additional matress, habol ug uban pa sa ubos nga presyo.
Sa higayon nga bation og kagutom, ang Kuyang Café nga nahimutang duol sa Mi Casa imong madangpan.
Lamian ug maabot kaayo sa bulsa ang ilang mga pagkaon ug imnonon sama sa Kuyang Classic Burger. Aduna sab silay nightly entertainment sa maong café ilabi na kun weekends.
UNSAON PAG-ADTO?
Aron nga di masaag, gamit og directional apps sama sa Waze o Google Maps paingon sa Mi Casa.
Alang sa dugang pangutana, duawa lang ang ilang official Facebook page: https://www.facebook.com/micasagarden