Gihugupan sa gatusan ka mga Katoliko ang kapilya sa Divine Mercy nga nahimutang sa Mount Hambubuyog, Barangay Mangaco, Lungsod sa Ginatilan, habagatang bahin sa Sugbo niadtong Sabado, Abril 15, 2023.
Ang maong adlaw mao ang kasaulogan sa Feast of Divine Mercy.
Wa panumbalinga sa mga deboto ang naglagiting nga kainit sa adlaw, sa ilang tuyo nga makaduaw alang sa ilang pangaliya atol sa kapistahan.
Kini ilabi adunay santos nga misa nga gipahigayon sa kapilya nga nagbuntaog sa bukid, dungan na sa pakig-bonding uban sa mga sakop pamilya, barkada, o hinigugma.
Sud sa gimuntar nga mga tolda, ilang gisaw-an ang ilang gipangbawon nga mga pagkaon.
Sa kadtong wa katambong sa misa, ang uban sa mga deboto nga gikan pa sa dakbayan sa Sugbo ug kasikbit nga mga lungsod nanagkot.
Tungod sa kadaghan sa mga tawo, nilagsik ang gagmay’ng mga patigayon nga nakahatag og higayon sa mga manindahay sa bukid atol sa maong kalihokan.
RELIGIOUS ATTRACTION
Human sa tulo katuig nga pagsuspenso sa in-person nga mga kalihukan sa simbahan tungod sa COVID-19, ang LGU-Ginatilan gipangulohan ni Acting Mayor Dean Michael Singco miabi-abi sa mga deboto nga nisuroy sa kapilya.
Gihimo pagbalik ang face-to-face nga kalihukan nga sama ini isip paagi sa LGU-Ginatilan aron sa pagdasig sa kadaghanan sa pagbisita nga giisip na sab nga usa ka relihiyusong tourist attraction sa lungsod.
Gawas sa pagsuroy sa nabantog nga kapilya, gidasig sab atol sa pagbisita ang paglig-on sa pagtuo ngadto sa Ginuo.
Ang maong kapilya adunay adunay 59 ka ang-ang sa hagdan nga natukod niadtong 2004 pinaagi sa donasyon ug pakigtambayayong sa simbahan, LGU ug ubang pribadong mga indibidwal.
Bukas ang kapilya sa tibuok semana alang niadtong buot mosuroy o mobisita, hangyo sa LGU ug kadagkuan sa simbahan nga ipatuman ang CLAYGO (clean as you go).
Sa pagkakaron, gitugutan ang pag overnight camping sa palibot sa kapilya sa kaugalingong risgo ilabi na nga anaa pa sa proseso o finalization ang paglakip niini sa lista sa lungsod isip tourist/religious attraction.
UNSAON PAG-ADTO?
Sa way kaugalingong sakyanan, gikan sa Ginatilan Proper nga manukad sa eskina sa 7/11 Convenience Store sa Brgy. Poblacion, adunay mga habalhabal nga makahatod paingon sa Brgy. Mangaco.
Sa plite nga P200 diin sud sa 30 ngato sa 45 minutos nga biyahe paingon sa Mount Hambubuyog diin nahimutang ang peak view sa Divine Mercy Chapel.
Mas bintaha nga mosuroy sa maong lugar nga maayo ang kahimtang sa panahon.
Tungod kay nag-umbaw man ang kapilya sa kinatibuk-ang lungsod sa Ginatilan, alang sa mga local nga Ginatilanon nagsimbolo kini nga ang Ginoo nagsud-ong ug nanalipod sa lungsod nga pabiling luwas ug layo sa dautan.
(TAMPO ni Donna Lavares-Andicoy)