Daghan kamo og masuwayan sa higayon nga makasuroy sa Guillen Plantaciones nga nahimutang sa Sityo Gabi, Cantipla, Barangay Sudlon II, bukirang bahin sa Cebu City.
Kini tungod kay ang Guillen Plantaciones usa ka resort farm nga haom sa glamping site ilabi na niadtong buot mag-overnight stay ug masuwayan sab ang all-terrain vehicle kun ATV ride nga makalibot sa maong lokasyon, aduna say horseback riding.
Ang naka-unique sa Guillen’s kay adunay silay ‘pick & pay vege’ nga nagpasabot kamo mismo makapamupo sa utanon o prutas nga buot ninyong paliton.
Ang mga guest adunay pribilehiyo nga personal nga makaani sa ilang mga produkto ug pagpalit niini nga adunay diskwento ang presyo.
Sa maong paagi, makatabang kini agi og suporta sa lokal nga mga mag-uuma nga nagtikad sa lainlaing mga tanom sama sa tamatis, lettuce, pepino, ug tam-is nga strawberry ug uban pa.
BAG-O PA
Bag-o pa lang nga gibuksan ang Guillen’s. Niadtong Hulyo 8, 2023 gipahigayon ang grand opening.
Ang tag-iya sa maong establisemento nga si Butch Guillen mapasalamaton ngadto sa mga tawo luyo sa katukoran niini.
Ilabi na ngadto sa mga mag-uuma, katabang, ug mga construction worker, nga nahimong bahin sa proyekto sukad sa pagsugod niini panahon sa pandemya.
Damgo ni Mr. Guillen ang pagpasiugda sa organikong pagpanguma ug usa ka eco-friendly nga menu nga ang gigamit nga sangkap naggikan ra sab sa ilang garden.
Ang resort naggamit sa solar power sa ilang elektrisidad ug adunay rainwater catchment systems nga tinubdan sa ilang water supply.
UNSAY NAA?
Ang maong farm resort adunay mga A-shaped cottages, bonfire area, private pool, infinity pool, dining options, recreational activities, ug “Pick & Pay” section alang sa pag-ani og mga utanon ug strawberry.
Alang sa dugang kasayuran o pangutana mamahimong mobisita sa ilang official Facebook page: https://www.facebook.com/guillenplantaciones/.