Karon nga pwede nang mobiyahe sa laing dapit, ilakip sa inyong bucket list ang Siyudad sa Iloilo sa inyong summer getaway. Dili mo bation sa kaalimuot bisan sa nagkainit o nagkataas ang temperatura kay hanginon ang klima sa Iloilo City.
Daghan og kasuroyan sa Iloilo City tungod kay usa kini ka karaan nga siyudad sa nasud ug usa usab ka first class highly urbanized city sa Visayas sama sa Cebu City.
Adunay heritage sites o mga kabilin sa dapit ug adunay dagkong infrastructure ug commercial developments.
Ang Iloilo City gilibutan og mga sapa ug dagat hinungdan nga hanginon ang palibot sa siyudad. Ilabi na nga gipangtamnan sab og ornamental trees ang kadalanan ug daghan kining mga open space, parke ug hardin.
Ang dul-an sa 10 ka kilometros nga Iloilo River Esplanade maoy usa sa main attractions sa Siyudad, usa kini sa area diin daghang mag-walking, mag-jogging, mag-Zumba, magsuroy-suroy, ug uban pa.
Sa mahiligon og selfie o groufie, Instagrammable sab ang Iloilo River Esplanade.
Ang Iloilo maoy usa sa mga nag-unang siyudad sa Pilipinas nga nagbutang og lapad nga bicycle lanes.
INILA
Gibantog ang Iloilo sa Pansit Molo, La Paz Batchoy ug biscocho. Daghang lamian nga kan-anan nga nag-serve og buffet sama sa Runway Kitchen sa Courtyard by Marriott Iloilo ug Camiña Balay nga Bato.
Sa Iloilo City makit-an ang gipang-anggaan og ‘female church’ ug ‘male church.’
Ang Jaro Cathedral, o ang National Shrine of Our Lady of the Candles, maoy male church tungod kay puro mga lalaki ang mga santos ang diha sa simbahan.
Matod pa sa tour guide nga si Paolo, ang mga dalaga nga nangita og uyab dinhi mosimba ug mangaliya sa mga santos nga tagaan sila og bayu.
Ang dakong imahen sa Nuestra Señora de la Candelaria de Jaro gibutang sa balkonahe sa Jaro Cathedral ug makita kini sa layo. Sa gawas sa cathedral ug sa atbang nga dalan, nagbarog ang kampanaryo nga gitukod niadtong 1744 apan sa pagkakaron, gi-rehab ang Campanario de Jaro.
Katong mga ulitawo nga nangita sab og uyab adto pud mosimba sa Molo Church o female / feminist church, kon aduna bay nakauyab human nisimba sa Molo Church, nitubag ang guide nga si Paolo nga basin.
Ang St. Anne Parish Church, o mas naila nga Molo Church, usa ka National Historical Landmark. Gibantog kini sa iyang Gothic architecture ug 12 ka rebulto sa mga santos nga babaye nga galinya sa kilid paingon sa altar.
MUST-VISIT
Daghang museums sa Iloilo City, usa na niini ang nag-inusarang Brandy Museum sa Pilipinas. Gidumala kini sa Emperador Inc., ang kinadak-ang liquor company sa Pilipinas ug labing dako nga brandy maker sa tibuok kalibutan.
Sa mga mahiligon og ilimnong makahubog, ayawg sipyata ang pagbisita sa Brandy Museum kay adunay free tasting.
Pipila lang kini nga mga must-visit nga lugar sa Iloilo City. Ang mga colonial houses nga gipag-iya sa mga adunahang pamilya usa pud sa mga attractions sa maanindot nga siyudad sa Western Visayas.
Ang Cebu Pacific adunay daily Cebu-Iloilo flight walay labot ang Sabado ug upat ka Iloilo-Cebu flights a week.
Ang Courtyard by Marriott Iloilo adunay promo packages alang sa gusto mag-book sa hotel.
Ta na, manuroy na ta! (MPS)