Ang lungsod sa Valencia, nahimutang sa bukirang bahin sa lalawigan sa Negros Oriental nga giilang ‘labing limpyo ug labing lunhaw (green)’ sukad niadtong 2017.
Pila lang ka kilometro ang gilay-on sa Dumaguete City, ang Valencia nga paboritong ‘side trip’ nga destinasyon sa mga langyaw ug lokal nga turista.
Tungod kay anaa sa lasang presko ug bugnawng hangin ang matagamtaman nga adunay pipila ka mga inilang busay nga nakapadani sa mga bisita.
Kon unang higayon pa lang sa pagsuroy sa maong lugar, mas bintaha nga mag-hire og tour guide, nga adunay rate nga magsugod sa P200.
SUROYANAN
Pulangbato Twin Falls – ang maong ngalan tungod sa dili kasagarang mga kolor sa mga bato nga naglibot sa maong busay resulta sa deposito sa asupre kun sulfur. Daw sama sa taya ang kolor sa mga bato.
Gikinahanglan nga magbaktas pagpaingon sa maong lokasyon ug aduna say kapuy-an niadtong gusto nga mag-overnight stay.
Red Rock Hot Spring – English version lang sa pangalan sa Pulangbato apan lahi kini nga atraksiyon.
Ang taya nga kolor sa mga bato namugna tungod sa oxygenation, nga nakaingon nga puwa ang talan-awon sa busay, apan way angay kabalak-an bahin sa tubig tungod kay safe ra maligo ug magbabad sa init nga tubod nga adunay temperatura nga gikan sa 37.5 hangtod 39.5 degrees celsius.
Daghan og health benefits nga ikahatag sa init nga tubod nga gituohan nga makaayo sa mga hubakon ug kadtong nag-antos sa arthritis.
Palinpinon Sulfur Vents – kon ang naila nga Smokey Mountain kay literal nga nag-aso ang bukid. Mga motorista ilabi na ang mga turista mohunong sa maong lugar ilabi na niadtong mga kuryuso.
Apan aduna lay baho nga mangalisbo sa maong hinungaw gumikan sa presensiya sa hydrogen sulfide nga gihulagway nga sakit sa ilong busa dili angay magpundo og dugay sa area.
Tierra Alta Residential Resort – sa paghuman sa inyong pagpanuroy usa sa nindot nga akong ikasugyot mao ang paghapit sa Tierra Alta, usa ka Greek-Mediterranean inspired hotel and resort nga nahiluna sa bungtod.
Masinati ang nindot nga panoramic view sa maong lugar.
UNSAON PAG-ADTO
Daghang alternatibo nga paagi pagpaingon sa Valencia, adunay bus nga maggikan sa South Bus Terminal, Cebu City.
Ang maong mga bus mobiyahe sakay sa roro nga manukad sa Bato Port, lungsod sa Samboan, lalawigan sa Sugbo tabok sa Tañon Strait nga modunggo sa Sibulan port, Dumaguete City.
Gibana-bana nga molanat ngadto sa lima ngadto sa unom ka oras ang kinatibuk-ang biyahe.
Aduna say laing alternatibo nga rota niadtong manukad sa Lilo-an, Santander, habagatang Sugbo sakay sa lantsa nga modunggo sab sa Sibulan port nga adunay gibana-bana nga 20 ngadto sa 30 minutos ang biyahe.
Pag-abot sa area, adunay mga motorbike rental nga mohatod kaninyo sa inyong destinasyon ilabi na niadtong way pribadong sakyanan. /