Niadtong Pasko, Disyembre 25, 2022, ako ug si Estrella, akong ‘partner for life,’ giimbitar sa among umagad, Atty. Collin N. Rosell ug sa iyang kapikas, Dr. Maria Theresa
Ceballos-Rosell (DBA), nga pakuyugon sa ilang pamilya sa usa ka suroy-suroy ngadto sa Cebu Safari and Adventure Park nga nahimutang sa lungsod sa Carmen, Cebu.
Kuyog namo ang tulo nila ka mga anak, sila Collin Mario, Coleen Therese, ug Coleen Marie. Nahiuban sab ang pito ka pag-umangkon ni Collin, mga anak sa iyang duha ka igsoong lalaki.
Gikan sa ilang panimalay sa Minglanilla, Cebu, gihapit mi nila sa sityo Panaghiusa, Basak-San Nicolas, Cebu City, human sa paniudto. Nindot ug malinawon ang among biyahe paingon sa amihanang Sugbo, gawas sa panagsang paghuot sa trapiko, labi na sa Mandaue City ug sa lungsod sa Consolacion.
Nalabyan namo ang mauswagong dakbayan sa Mandaue, mga lungsod sa Consolacion, Liloan, Compostela, dakbayan sa Danao, hangtod nahiabot kami sa Poblacion sa Carmen diin may karatola nga nagtultol sa dalan paingon sa bukid, sa Cebu Safari & Adventure Park.
KANINDOT SA TALAN-AWON
Samtang nagdagan ang among sakyanan gibusog ko ang akong mga mata sa kaanindot sa mga lunhawng kakahoyan ug kasungotan nga naglaray sa dalan ug nagliyong sa mga bakilid nga among nalabyan. Usa ka ‘virgin forest’ sa akong panan-aw.
Didto sa opisina sa Park nanglukat mig tiket ug gikodakan sa ilang ‘photographer’, una mi manakay sa ‘tram’ nga ilang service paingon sa lainlaing dapit diin nagpuyo ang lainlaing mga hayop.
Dunay mga zebra, deer, caribou, desert tortoise, liyon, tigre, sawa, kangaroo, kamel, ug uban pa.
Sa ‘aviary’ daghang mga langgam, ang mga gagmayng periko mamatog sa mga ulo ug abaga sa mga bisita.
May ostrich, peacock, makalingaw sila tan-awon ug makapahinumdom nato nga dili ra kitang mga tawo ang namuyo ning atong kalibotan.
Nindot sab hanggapon ang lab-as ug bugnawng hangin sa bukid nga modalit og kahayahay sa imong dughan.
Gikan sa Cebu Safari & Camp; Adventure Park nagpadayon ang among suroy-suroy paingon sa dakbayan sa Bogo nga maoy giplanohan ni Collin, lider sa suroy-suroy nga adto mamahuway ug magpalabay sa kagabhion.
Gilabyan namo ang mga lungsod sa Catmon, Sogod, Borbon, ug Tabogon ug nahiabot mi sa Bogo City.
Mi-check in mi sa 4K’s Pension House nga tupad sa Seaside Restaurant.
Pagka sunod adlaw, Disyembre 26, 2022, human sa among pamahaw sa McDonald, ni-check out mi sa 4K’s.
Si Collin imbitado sa Rosell-Juban clan reunion nga didto ipahigayon Woody’s Beach Resort sa lungsod sa Medellin.
Hapit na motunod ang adlaw sa kasadpan dihang nananghid si Collin sa iyang mga paryente nga mamauli na mi sa dakbayan sa Sugbo.
Nalabyan na pod namo ang Bogo City, Tabogon, Borbon, Sogod, Catmon, Carmen, Danao City, ug Compostela.
Mihunong ang among sakyanan sa Liloan, atubangan sa Titay’s Rosquillos aron manimo-timo (esnak).
Nangaon mi sa ilang lamiang pan, meat roll, ug rosquillos nga giparesan og init ug espeso nga sikwate, nga nakapahinumdom nako sa among balangay sa Cawayan, Dalaguete, Cebu, kon pista, diin ang espeso nga sikwate nga gisulod sa gagmayng mga tasa lami kaayo nga ipares sa torta.
Human sa among pagpangaon sa snacks, nagpadayon ang among biyahe paingon sa Cebu City, agi sa lungsod sa Consolacion ug sa dakbayan sa Mandaue.
Usa ka nindot nga Pinaskuhan nga gika-uban ang tibuok banay sa among pagpanuroy.