Kon dagat ang hisgutan, unang pangitaon sa mga nagplano nga mosuroy mao ang white sand.
Apan nasayod ka ba nga aduna’y beach sa Mindanao nga kolor pink ang balas?
Ang maong matang sab talagsaon rang ma-encounter sa bisan asang suok sa kalibutan.
Nahimutang sa Basilan Strait, duol sa baybayon sa city proper sa Zamboanga City ug mga upat ka kilometro o 20 minutos lang nga biyahe sa barko gikan sa Paseo del Mar, maabot ka na sa Las Islas de Santa Cruz o ang Santa Cruz Islands.
NGANONG PINK?
Ang mga isla nga nasakop sa Santa Cruz Islands nagtanyag og rare pink sand nga resulta sa nangadugmok nga red organ pipe coral nga naanod sa baybayon sa isla ug nasagol sa white sand niini.
Sa nasayran nga ang Great Santa Cruz Island gilibutan og nagkadaiyang matang sa marine wildlife, maong gikonsiderar ang dapit nga protected landscapes and seascapes sa Department of Environment and Natural Resources-Biodiversity Management Bureau ug hugtanong gibantayan sa Protected Area Management Office.
Tungod sa kaanyag sa lugar, naapil ang Las Islas de Santa Cruz sa 21 Best Beaches in the World sa National Geographic.
Bisan pa og relatively safe ang pag-adto sa isla, giseguro gihapon sa lokal nga kagamhanan nga aduna’y kuyog ang mga bisita nga mga military escort ug armed security personnel sa Philippine National Police ug Armed Forces of the Philippines.
UNSAY NAA?
Gawas sa pink sand, aduna pa’y lain nga siguradong malingaw ang mga turista.
Usa niini ang lagoon tour, diin dad-on ka sa komunidad sa Sama Banguingui sa bakhawan sa isla ug sa maong dapit ma-explore nimo ang centuries-old nga mangrove forest.
Imo sab nga matilawan ang fresh sea grapes o lato, ug adunay kahigayonan nga imong ma-encounter ang stingless jellyfish.
Sa kadtong ganahan og adventure, puwede pud ka mosakay sa colorful nga mga vinta, ang tradisyonal nga sakayan sa dagat sa mga Sama-Bajau, Tausug ug mga Yakan sa Sulu archipelago, ug dad-on ka niini sa mga palibot sa isla.
Kon maka-timing mamahimong mobisita sa sandbar nga anaa tunga-tunga sa kadagatan.
UNSAON PAG-ADTO?
Tungod ang Santa Cruz Island usa ka protected area, kinahanglan nga aduna kay prior booking nga at least 30 o two days sa dili pa mosuroy sa maong dapit.
Mamahimong mo-email og booking inquiry sa zcpamolgu@gmail, sa ilang cellphone number nga +63 905 601 6316 o sa ilang Facebook page nga Las Islas de Santa Cruz (@pinksandbeachzcph).
Padad-an ka nila og fees, manifest form ug ang booking ‘dos and don’ts.”
Andama pud ang valid ID, ang fully accomplished manifest form ug ang inyong vaccine cards kay kinahanglan kini i-submit online.
Dali lang ang pag-adto sa drop off point sa isla. Inig abot sa Aeropuerto Internacional de Zamboanga o ang Zamboanga City Airport, mamahimong mosakay og tricycle ug ingnon nga dad-on ka sa Paseo del Mar.
Puwede sad ka mosakay og jeep nga padung sa Pueblo. Inig naog, malakaw na lang ang Paseo del Mar.
Ang Santa Cruz Island abri alas 7 sa buntag hangtod alas 2 sa hapon. Ginadili ang pag-camping o ang pag-overnight sa lugar.
PAHINUMDOM
Ginadili ang pagkolekta sa mga coral shells ug balas ug mga buhi o non-living animals/plants gikan sa lugar.
Tungod sagrado ang lugar sa mga Bajau ug Sama people ug adunay mga traditional burial site sa isla, ginadili ang pagdala og mga ilimnong makahubog ug sigarilyo.
Tungod kay protected area pud ang Santa Cruz, ginadili ang pagdala og single-use plastics sama sa PET bottles, styrofoam, wrappers, sando bag, plastic nga kubyertos ug wet wipes.
Sa akong experience, strikto kaayo nga gipatuman sa Pamo ang maong mga balaod.
Busa aron atong mapanalipdan ang kinaiyahan bitbita ang imong basura o ang paglabay niini sa tukmang lugar./Ubang hulagway gikan sa Turismo Local de Zamboanga .