Dili lang puti nga balas sa baybayon, diving spot ug Sardine Run ang masinati sa lungsod sa Moalboal, Sugbo.
Gawas niini, adunay laing atraksiyon ug kasuroyan sa maong lungsod ang ‘The Woodside’ nga nahimutang sa 1,500 ka ektarya nga luna sa Sityo Buay-ay, Barangay Balabagon, Moalboal.
Ang Woodside usa ka eksklusibong kapuy-an nga adunay dos andanas nga payag ug laing duha ka mga payag nga ginama sa kawayan nga adunay lapad nga beranda.
Iyang ambience inspired sa tradisyonal nga pinuy-anan sa mga Pinoy.
Apan makaingon ko nga gitun-an ang arkitektura ug lahi kini sa mga payag nga imong makit-an kay nalakip niini ang sliding window nga perfect pang-insta-pic sa sayong buntag ug pagsalop sa adlaw ilabi na niadtong mahiligon magpost sa ilang social media.
Haom kini nga lokasyon alang niadtong nangita og malinawon ug swak sab kini sa gusto og kahilom dunganan sa preskong hangin nga wala sa siyudad.
Siguradong makahupay sa stress gikan sa ka-busy sa mga gimbuhaton sa trabaho ug suliran sa personal nga kinabuhi.
GLAMPING (glamorous camping)
Ang glamping nagpasabut nga adunay kaistaran nga sagad adunay framed shelter nga kompleto sa mga pasilidad sama sa matress, kasilyas, kuryente ug tubig, base sa pasabot sa usa ka travel magazine.
Inay ang naandan nga camping nga mopasilong o magpagabii gamit ang tent.
Sa kadtong gustong magpalahi o nangita og adventure sa inyong pagpanuroy suwayi the The Woodside, Moalboal.
Haom kini sa mga adventurer nga barkada, pamilya, o sa kadtong buot mag inusara.
Para sa unom ka guests, P2,000 ang mabayran ug naa sab silay laing gi-offer nga P1,000 para sa duha ka tawo.
Ang matag cottage room gisangkapan usab sa tanan nga gikinahanglan nga mga bed linen alang sa usa ka malinawon nga pagkatulog sa gabii.
Atol sa akong pagsuroy sa The Woodside paingon na mosawop ang adlaw, nga overlooking kaayo ang view sa Badian Island, Pescador Island, Moalboal lowlands nga alang nako nindut nga kasinatian.
GIDALIT
Mahimo nga mag-order og mga pagkaon gikan sa The Woodside, apan kinahanglan nimo ang pag-order in advance.
Mahimo usab nimong sulayan ang ilang seafood bilao, nga naglakip sa dili mapugngan nga mouth-watering seafood delicacy sama sa garlic butter shrimp, chili crab, grilled scallops, calamares, ug grilled tuna.
Wala silay corkage fee maong gidasig usab nila ang pagdala og mga klase-klaseng ilimnon sa ilang bisita ug mamahimong makahulam sa ilang gamit sa kusina.
Mamahimo sab nga makasugba-sugba sa inyong paboritong sugbaunon.
Pwede sab ka magpa-picture sa ilang nataran nga naay pipila sa ilang sunflower.
Hayahay ug instagrammable kaayo ang ilang bamboo shower.
Anaay laing ikadalit ang The Woodside, ang Busay Spring and Cave diin 15 minutos ang biyahe gikan sa ilang site.
UNSAON PAG ADTO?
Ang ensaktong lokasyon sa The Woodside mao ang Sityo Buay-ay, Barangay Balabagon, Moalboal, Cebu nga gibana-bana nga 15-20 minutos gikan sa White Beach ug Panagsama Beach.
Kon manukad sa Cebu City molanat sa tulo ka oras ang biyahe kon dili trapik.
Sa mga mag-commute sakay og bus sa Cebu South Bus Terminal ug manaog sa sentro sa Moalboal, adunay traysikol nga kasakyan paingon sa The Woodside.
Mahimo usab nga mohangyo sa konduktor nga ihunong ang bus sa Brgy. Balabagon ug maghabalhabal sa The Woodside.
Sa mga magdala og sakyanan, dili mabalaka kay lapad ang parking area ug safe ang lugar.
OPERASYON
Ang The Woodside abli sa tanan nga mobisita ug molantaw sa ilang luna.
Sa mga gusto magpa-book ug reservation moadto lamang sa ilang Facebook page; https://web.facebook.com/WoodsidePH/ o motawag sa ilang numero 0923 589 4825.