SA ikaduhang hugna niining atong Super Suroy diin sa mi-aging semana nakapagawas nato ang Part I Cebu Loop Endurance Ride 2021.
Katuyoan sa maong kalihokan nga gipaluyohan sa Department of Tourism (DOT)7 mao ang pag-promote sa turismo sa Lalawigan sa Sugbo human mi-igo ang pandemiya resulta sa coronavirus disease (Covid-19).
Kon sa miaging edisyon atong gipakita ang mga suroyanan sa pipila ka dapit habagatang (South) bahin sa Sugbo, karon atong ipa-ambit ang pinili nga mga lugar sa amihanang bahin sa Sugbo.
NORTE
Ang unang spot check ang Sidlak Danao nga makita duol sa pantalan sa maong dakbayan.
Lami sad diay akong pamahaw kay bag-ong haon nga tinap-anan nga maoy akong sud-an.
Adunay mga kan-anan nga nagbaligya niini nga naglumbay sa highway ug dali rang matultulan.
Gisunod ko og subay ang sunod nga checkpoint nga mao ang Shine Daan Bantayan nga landmark.
Nahimutang kini sa tumoy nga bahin sa norte.
Sa dili pa moabot sa maong lungsod malabyan ang unom ka mga munisipalidad ug ang Dakbayan sa Bogo.
MAKASAYSAYANON
Inay sa mga naandan nga tourist spot sa mga makasaysayanong lugar ang akong gihunongan, bisan pa man nga adunay uban niini dili kabahin sa spot checks.
Usa na niini, ang marker sa pagtahan sa Japanese Forces nahimutang sa Lungsod sa Tabogon.
Base sa kasaysayan ang maong pag-surrender sa mga Hapon nahitabo niadtong Agusto 28, 1945 diin 2,667 ka mga sundalong Hapon ang mi-surrender sa US ug Filipino troops sa Northern Cebu.
Gisunod nako og duaw ang karaang tanke ang US M5A1 nga anaa mahimutang sa tulay sa Dagusungan, sa Lungod sa Medellin.
Panahon sa ikaduhang gubag sa kalibutan gibombahan ang maog tanke sa mga tropang Hapon hinungdan nga nahulog kini sa sapa.
Ang Stuarts mga light tank nga gigamit sa US ug Allied Forces nga napamatud-an nga epektibo nga armored vehicle alang sa gubat sa kalasangan.
Base sa record sa U.S. Army unang nag-deploy og 108 ka Stuart light tank sa Pilipinas niadtong Septiyembre 1941.
Niadtong Marso 7, 2020 maoy pagka-ugkat diin milanat og 10 ka adlaw aron paghaw-as sa tanke nga nalubong sa sapa sud sa 75 na katuig.
Gihimo na kini nga atraksiyon sa Lungsod sa Medellin.
KATAPUSAN
Sa hinapos nga bahin sa endurance ride ang mga riders mipatighug sa Tabuelan Municipal Plaza alang sa laing spot check.
Na timing ang akong paniudto sa Tuburan Café diin ang maong dapit ako nang pa-ambit sab dinhi sa Super Suroy section ning pamantalaan.
Ang katapusag mao ang Balwarte Alfredo nga mosubay gihapon sa TCH.
Ug tuod man, nahuman nako ang maong challenge, nga may oras pang nahibliin sa dili pa ang cut-off, sa SRP sa dakbayan sa Sugbo.
Sama sa tinguha sa mga tigpasiugda, ako nagtuo nga ang mga grupo sa mga riders ug bikers makatabang sa pag-promote sa mga nagkadaiyang destinasyon sa Sugbo.
Gawas na sa mga inila nga suroyan hinaot nga mahatagan sab og luna ang mga dapit nga wa pa kaayo madiskubre og mapa-ila ila ngadto sa publiko.