Ang Siargao Island usa sa mga destinasyon sa mga local ug langyaw’ng turista gumikan sa mga bahandi niini nga mga suroyanan nga sa isla lang nimo makita.
Ang isla giila nga surfing capital of the Philippines tungod sa kadagko sa mga balod nga gikan Pacific Ocean. Gani adunay nay mga international nga lumba sa surfing nga gipahigayon sa maong isla matag buwan sa Septiyembre.
Gituyo kini sa maong buwan nga ika-siyam nga buwan sa tibuok tuig tungod sa balod nga moporma og numero nuybe, hinungdan nga adunay sikat nga lugar sa maong dapit nga gitawag og Cloud 9 nga dagsaan sa mga turista.
Gawas sa hampak sa mga balod, masinati sab ang nindot nga view sa pagsawop sa adlaw.
KALINGAWAN UG UBAN PA
Daghan ka og kasuroyan gawas sa pag-surfing kay adunay nagkadaiyang mga kalihukan nga mahimo nimo’ng masuwayan.
Kon mahuman sab ka sa imong tibuok adlaw nga adventure, adunay mga kalingawan matag gabii nga nahimutang sa General Luna.
Di makompleto ang imong Siargao trip kon dili nimo masuwayan ang night life sa maong isla, nga adunay nagkalainlain nga local bands nga manukar.
NASAYOD KA BA?
Ang Siargao duol sa Pacific Ocean ug ang Pilipinas nagsilbi nga tourist alternative sa Tahiti, usa sa labing dako nga isla sa French Polynesia ug Oahu sa Hawaii.
Ang surfing maoy main nga atraksiyon sa Siargao nga nagsugod niadtong 1980 sa dihang duha ka mga langyaw nga sila si Tony Arruza and Steve Jones ang miduaw sa isla aron sa pagpangita og ‘perfect wave’.
Nadiskubrehan ang lungsod sa General Luna ug mihingalan sa balod nga ‘Jacking Horse’ ug karon gitawag na og Cloud 9.
MGA SUROYANAN
Ania akong mga lista sa ubang lugar nga kasuroyan sa Siargao nga siguradong dili ka ma-bored sa imong pagbakasyon: Cloud 9, Maasin Coconut View, Maasin Enchanted River, Sugba Lagoon, Magpupungko Tidal Rock Pool, Naked Island, Guyam Island, Sohoton Cove ug Del Carmen Mangrove Forest.
UNSAON PAG-ADTO?
Duha ka paagi ang pagpa-ingon sa Siargao kon ikaw nanukad sa Sugbo, mahimong magbarko o eroplano nga direkta ngadto gayud sa Isla sa Siargao.
Samtang ang barko via Surgiao ug sa imong pagdunggo sa pantalan sa Surigao, adunay ro-ro o fastcraft nga mobiyahe paingon sa isla.