USA sa mga giatngan nakong kandidato nga mogawas sa mga political talkshow sa kaulohan ang aktor nga si Lito Lapid nga nag-una karon sa mga lalaki sa senatorial survey sa Pulse Asia.
Nag-atang-atang ko niya niadtong Dominggo sa gabii sa “Harapan 2019” sa ABS-CBN apan wa siya.
Wa sad siya sa “senatorial face-off” sa GMA-7 sa miaging semana.
Pero ngano si Lito Lapid may No. 1 sa mga lalaking senatorial candidate sa survey?
Si Bong Revilla nga grabe kaayo ang isyu sa korupsiyon pero pasok sad sa Magic 12. Ngano kaha?
Ah, kamo na lay tubag kay sigurado kong pareho ra sad ta og tubag. Hehe... Bisan ang social media way nahimo ani. Kamo na lay pag-showbiz!
MAHARLIKA
Sa miaging tuig duna to’y gustong ilisan ang katapusang linya sa Lupang Hinirang.
Karon na sad gusto nilang ilisan ang pangan sa Pilipinas ngadto sa Maharlika. Pagka wa gyuy lingaw!
Sa kadaghang problema sa atong nasud nga nagkinahanglan og dinaliang aksyon naa pa gyud silay panahon no nga ilisan ang atong pangan.
Onli in da Pilipins!
BUBBLE GANG
Akong na-interbyu ang pipila sa cast sa television gag show nga “Bubble Gang” nga nibisita sa Sugbo niadtong Valentine’s Day. Yes, silay atong bida sa Ssssuper Ka! karong Huwebes.
Bisan nag-uwan jampacked ang musical play sa Bubble Gang nga “Parokya Nato: A Laugh Story” sa Waterfront Cebu City Hotel niadtong Biyernes.
Pagka-Sabado sa buntag ang pipila sa cast nga silang Valeen Montenegro ug Chariz Solomon nakit-an nga nisuroy pa sa Papa Kits sa Liloan.
STARSTRUCK
Pagkadaghan gyud diay nangandoy mahimong artista. Nakakita pa lang mo sa grabeng tawo nga nipa- audition sa StarStruck sa Robinsons Galleria Cebu niadtong Sabado makaingon gyud mo’g “bitaw no!”
Pagka-alas 5 sa hapon di na mabangbang ang crowd sa paghiabot sa Kapuso stars Bianca Umali ug Miguel Tanfelix sa Robinsons Galleria.
Kauban sad nilang Bianca ug Miguel ang StarStruck Season 6 Ultimate male survivor nga si Migo Adecer.
Sila ang lead cast sa GMA upcoming primetime drama series nga “Sahaya” nga magsugod na sa Marso.