Dear Noy kulas,
Maayong adlaw nimo, Noy. Ako diay si Nolan, 36 anyos, Magpatabang unta ko nimo unsay angay nakong buhaton sa akong manghod. Itago lang sa ngan nga Titot, 20 anyos.
Grabe naman god kaayo iyang bisyo sukad namatay among mga ginikanan. Nagsige lang og kahubog ug gamit anang ginadiling drugas.
Nagsige na kog badlong sa akong manghod nga undangon na niya ang iyang bisyo apan pakyas man gihapon ko.
Naluoy na ko niya kay kami ra man god duha ang magsuon. Ako kay minyo na man samtang siya ulitawo pa. Unsa man ang akong buhaton, Noy, nga mausab na siya. Naluoy ko nga naghuna-huna sa iyang kahimtang. Tabangi intawon ko.
Daghang salamat.
NOLAN
Nolan,
Mas maayong modangop ka sa Barangay Anti Drug Abuse Council (BADAC) aron magiyahan ug matabangan ka unsaon nimo pagpa rehabilitate ang imong manghod.
Kana ra ba gyung edara malisod kaayo nang kombinsihon nga magpa rehab busa medyo gikinahanglan ang pwersahan.
Apan angay sab nga susihon kon mahimo bang mapugos ang imong manghod nga di na kinahanglan pang mogamit og mga pulis.
Base lang sa akong experience sa mga kinabuhi sa pipila ka mga tawo nga akong nailhan, di sayon ang pagpa rehab sa mga drug user.
Sagad sa malampuson nga rehabilitation mao ang kaugalingong kahiamgo sa hingtungdan nga di diay maayo ang iyang gibuhat.
Mas dali ang recovery kay sa pugsanay ug way self realization, di kaayo malampuson kay mag relapse.
Anyway, for guidance lang ning akoa kon asa ka magsugod sa pagpalingkawas sa imong igsuon gikan sa mga kamot sa drug addiction.
NOY KULAS
rojval69@yahoo.com