Dear Noy Kulas.
Maayong adlaw nimo, Noy. Magpatambag ko nimo.
Tawga ko og Rene, 30 years old na but single gihapon kay loyal kaayo sa GF but nagmahay ko nga gaing ani ko. Taguon lang nato siya sa ngan nga Lorna. Nilarga siya sa abroad kay toa na siya nag work didto ug basin mag-immigrant.
Sakit kaayo kay iya kong gibuwagan sa email ra unya gi block na ko niya sa social media ug Messenger. Di na siya nako ma contact sa iyang number. Wa pa nako tubaga ang iyang email kay nakalitan ug nasakitan pa ko sa iyang gibuhat. Imagina lang, Noy, 8 years ang among relationship nya giing ani lang ko kasayon niyang gibuwagan.
Nituman ko sa tanan niyang gusto kay ganahan siya nga kanang naay mahitabo namo, husband and wife na mi. Tuman ra sab ko kay love kaayo nako. Nag kiss kiss ra mi kutob until nga nilarga siya kay para kuno lagi sa among future.
Noy, unsa kahay akong buhaton kay until now, gisakitan pa ko og maayo sa iyang gibuhat. Sakit kaayo ba nga sa kadugay namo ing ani ra ang resulta sa among relasyon. Bati kaayo og ending. Please tambagi ko.
RENE
Rene,
Sakit tuod nang maputol ang relasyon, labina kon dugay na kaayo, ikaw ang gibiyaan ug taas kaayo ka og expectation apan sa kaulahian kalit lang nahanaw ang tanan. Ang nakasakit pa nianang imong sitwasyon kay gipaagi lang og email. Maora ba og gidugangan ang kasakit og insulto. Di lalim nga imong gituman ang tanan kay imo siyang girespeto tungod sa gugma but sa kadakong kasayon, giputol lang pinaagi sa email.
Kadto wa nakigbuwag nimo og tarong, bisan sa video call na lang, kay wa siyay rason nga ikasulti nimo kon nganong nakigbuwag siya. Mao na ang iyang rason nga siya ga-email na lang sa pagpakigbuwag nimo. Sama gud anang uban diha nga nang ghosting na lang kay bisan unsaon ang pikas party way sala.
Start na pag move on. Dawata ang iyang pagpakigbuwag. Mahimo rang imo siyang idedma at this time nga naa ka pa sa tumang kasakit. Unya na kon makabarog ka na gikan sa kasakit. Pasagdahi siya kay siya ang nawad-an og tawo nga maayo, di ikaw. Ang iyang ka layo makatabang kaayo nimo sa pag move on. Tangtanga sab siya gikan sa imong kinabuhi. Mao na ang pagsugod sa imong journey to recovery.
NOY KULAS
rojval69@yahoo.com