DEAR Noy Kulas,
Tawga lang ko og Babe, 40 years old. Minyo na ko ug nakabana og chicks boy kaayo. Bisan uyab pa mi kaniadto ingon ani na siya. Bisan tulo na ang among anak, wa gihapon siya mausab.
Kadaghan na mi mag-away kay pirme nako siya masakpan sa iyang pagpamabaye. Dugay na unta nako siyang biyaan pero nahanugon ko kay maayo siya og negusyo. Buhong mi sa among mga anak sa luxuries nga among gikinahanglan. Di usab ko gusto nga magdaku ang among mga anak nga way amahan.
Wa ko magdahom nga moabot ang pinakagrabe nga hitabo sa among pamilya. Ang latest niyang victim ang akong manghod nga dalaga nga toa sa abroad. Akong naukayan ang iyang Messenger kay na hack nako ang password sa iyang account. Didto nako nasakpan nga uyab sila ug nagsabot nga magkita sa Manila. Pwerte namong awaya sa akong bana ug sa akong manghod. Apan instead masuko ang akong parents ngadto sa akong bana, nilaban sila ug sa akong sister kay kuno ako ang mabasol kay maldita ko ug wa na ko modala sa role isip asawa. Six months na mi, Noy, nga way sexual contact kay mahadlok kong masakit kay dukirok ang akong bana. Please tambagi ko.
Babe
Babe,
Usahay bitaw makapahibung ang mga hitabo rong panahuna, labina sa material nga kalibutan. Nagtuo ko nga kining imong parents gigastuhan sa imong sister kay sagad ra ba sa ingon ani nga sitwasyon, maoy mahitabo. Ang way kwarta maoy makaluluoy kay ang kwartahan maoy labanan.
Bisan unsaon pa nimo nang imong bana, kon mao na gyud nay iyang nature, ingon ana na siya hangtod sa hangtod. Imo ra man sab nang desisyon gud nga pasagdan siya anang iyang pagka babaero kay lagi supported mo materially. Bisan gud unta nga di mo mag-uban sa usa ka balay, mahimo man nga maka ask kag support niya, labina sa mga bata, tungod kay siya man ang amahan. Nakalatid ni sa balaud.
Imong pilian ang pagpakabuta bungol, pagkiha niya kon duna kay lig-ong mga ebidensya ug pagbuwag niya. Mao na ang tulo ka alternatives nga imong mahimo. Pilion ba nimong mag-antos uban kaniya bisan kadaghan ka na nasakitan?
Noy Kulas