Dear Noy Kulas,
Maayong adlaw nimo. Bisan naa na ko sa abroad, akong giatiman ang akong pamilya kay nanrabaho ko diri para nila. Bisan 34 years old na ko, wa ko magminyo kay motabang pa ko sa akong mga ginikanan ug igsuon.
Karon naguol ko kay ang akong manghod na depressed sukad siya gibuwagan sa iyang girlfriend for four years. Mga three months na to nahitabo pero ingon sa akong parents nagmukmok gihapon sa balay ug way gana nga mokaon ug niundang na gani sa iyang work kay kauban niya ang babaye sa iyang gitrabahoan. Kani gud akong brother seloso kaayo so tingali wala na kaagwanta ang girl mao to siya gibuwagan.
Kuyawan sila basin unsay mahitabo kay nidaot na siya ug madunggan nila nga naay nights nga maghilak. Problema namo ni kay di ni siya tigbarkada ug gamay ra siya og friends. Naa kay matambag, Noy Kulas, aron matabangan ang akong brod? Daghang salamat.
NOYNOY
Noy,
Ipakita sa iyaha nga naa mo nga nagmahal niya. Ang pagpakigsulti niya ug ang pagpakita nga concern mo niya dako og ikatabang sa pagtibhang sa iyang kaguol nga gibati. Kanang ganahan mo maminaw niya. Kon kinsa ang iyang suod sa inyong pamilya, pananglitan igsuon, ig-gaw ba, pangayoi og tabang kay gikinahanglan niya ang pagpagawas sa gibati pinaagi sa pag share sa ka sakit.
Mag-expect mo nga di tanang sakop sa pamilya maka open siya mao nang mas maayong anha magsugod sa iyang suod. Then kon wa sa relatives, sa iyang few close friends mao ang hangyoa. Lahi ra ang dunay maestoryahan ug mapasaw-an sa ka sakit nga gibati sa tawo. Makuha-kuhaan nga maoy magdala ngadto sa hinayhinay nga recovery.
Ayaw lang ninyo pasagdi nga di siya mokaon. Ang support ninyo, labina sa imong parents importante kaayo ning panahuna aron di mograbe ang iyang sitwasyon. Abagi usab og pag-ampo.
NOY KULAS
rojval69@yahoo.com