Dear Noy Kulas,
Tawga lang ko sa angga nga Mikel, 40 years old. Usa ko ka OFW kaniadto, but niundang ko human nakatigom ug naka business. Minyo ko ug naa mi mga anak nga nag high school na pulos. Lahi sa ubang OFW nga naproblema sa marriage, kami sa akong asawa okay ra. Wa ko nakabantay o nakadungog ang akong family nga naa siyay karelasyon nga lalaki. Sagad naa ra siya sa balay nag-atiman sa among gisugdan kaniadto nga business. Sagad ang iyang mga amiga ang magbisitahan niya.
Karon lang bag-o, naay nag PM nako nga ang akong misis ug usa sa iyang mga amiga dunay relasyon kay ang akong misis tomboy. Naglisod ko og tuo kay gwapa ug sexy ang akong misis. Kon romansa ug sa kama, wa man koy problema niya. But pag send sa picture sa nag PM nako nga naggamit og dummy account, medyo nakatuo ko kay ang babaye very close sa akong misis ug usahay ari gani matulog sa balay. Pirme sab sila kuyog manglaag.
Noy Kulas, wa man kaayo ko masakiti kay di lalaki ang gipasanginlan nga iyang karelasyon. Pero di ba cheating is cheating? Maayo ba kaha nga ako siyang i-confront? Di kaha ni pang intriga lang?
MIKEL
Mik,
Mas maayo nga imo unang panid-an ang imong misis instead imo dayon nga i-confront kay basin tinuod na. Mas maayo sab nga imong i-confirm daan kay basin nga intriga lang ni. Daghang mga tawo karon maayo kaayo nga momugna og mga sugilanon nga bunga ra diay sa hugaw nga huna-huna.
Yes, bisan babaye ang karelasyon, it is still cheating. Sa conservative views gani, bisan ang pakigsuod o pag flirt sa opposite sex gitawag man gihapon na og cheating. But ang pangutana, unsa may imong buhaton if imong ma confirm nga duna silay relasyon ug nga ang imong misis tomboy o bisexual siya? Mao na ang angay mong hinuktokan sab if mo-pursue ka sa imong pagsusi kon tinuod ba o dili ang gisulti sa nag PM nimo.
Pasayloa siya if imong mamatud-an nga tinuod apan ipaputol ang relasyon nilang duha. Paundanga na og anha sa inyong balay ang babaye. Examine sab if wa ka ba nagkuwang niya mao nga diha siya nakakita og time uban sa mao nga babaye? Huna-hunaa sab nga duna moy mga anak nga ma affected if mahibawo sila sa inyong problema.
NOY KULAS