Deserved matag usa kanato og chillaxation human sa stressful nga trabaho, pagtuon o sa ubang personal issues nga atong giatubang.
Angay lang nga mo-break kita o mopahuway panagsa aron maka-recharge sa sunod na sab nga hagit sa kinabuhi.
Ang Super Suroy mopa-ila ila niining bag-uhay lang gibuksan nga café sa Barangay Kabangkalan, Lungsod sa Tuburan nga nahimutang sa midwest nga bahin sa Lalawigan sa Sugbo.
Garbo nga gipahibawo ni Tuburan Mayor Democrito 'Aljun' Diamante ang lain na sab nga atraksiyon sa iyang lungsod, ang Tuburan's 360 Degree View Café.
Sa atong pagsuroy sa maong dapit, akong nakita nga siguradong patok ang maong café dili lang sa mga hamtong apan lakip na sa millennials.
"Breathtaking" ang bugtong akong mahulagway sa lokasyon nga haom sa ngalan sa maong estalisemento nga 360 degree view.
Way nakasalipod sa imong panan-aw ngadto sa matag kurba sa mga bukid nga gitabunan sa mga gabon kun "sea of clouds" kon sayo ka sa buntag motaak sa maong lugar.
Bisan tuod nga long and winding road ang pagpadulong sa 360 View Café, apan dili ka laayon sa imong biyahe kay masud-ong ang kinaiyahan ug limpyo ang hangin nga imong mahanggap, gawas nga way samok, di sama sa siyudad.
Usa pa sab, sementado ang kalsada nga maghatag og kasayon sa mga motorista nga mosubay sa maong dalan patungas ug padulhog sa bukid.
AMBIENCE
Sa inyong pag-abot sa café matagbaw ka pag ayo sa maong dapit. Gawas sa makapangangha nga talan-awon sa palibot, ingon man sa mga pagkaon nga ilang gidalit, "restaurant quality" ug affordable sa bulsa ang presyo sa ilang menu.
"Duna mi concept nga 'farm to table' nga pagkaon.
"Among gi-serve nga pagkaon is organic, locally produce," tipik sa pamahayag ni Mayor Diamante.
Sagad sa ingredients nga gigamit sa ilang mga luto gikan sa utanon, lagutmon, ubang karne, gikan ra sab sa ilang umahan.
Gikan sa appetizers, main course, desserts, pastries ug coffee ug cold drinks makapili ka nga diha ra sa maong café nimo mapalit.
Samtang nagpaabot sa inyong order, mamahimong makasud-ong sa lokasyon ug pahimusli ang kinaiyahan nga background sa inyong selfie o groufie.
Sigurado nga ang inyong post diha sa social media account, "lakas maka-nature vibe."
Adunay al fresco (gawas nga bahin) o indoor dining. Bisan og anaa ka sa sud magkalingaw og kaon ug higop sa ilang kape, di ka mabalda sa paglili sa gawas nga bahin tungod kay gilibotan sa glass panel ang bungbong sa maong estalisemento.
Dili layo sa café ang Tuburan coffee farm, nga naghimo sa lungsod nga giila nga "Cebu's Coffee Capital."
Makahapit sab mo og suroy sa coffee farm nga inyong makita ang proseso sa paggama niini, gikan pa sa coffee bean ngadto sa kape nga ibutang na sa tasa.
"Usa ni sa maka-create og impact sa local tourist, considering nga di kaayo layo sa lungsod ug guwapo ang kalsada," dason ni Mayor Diamante.
UNSAON PAG-ADTO?
Kon manukad sa Dakbayan sa Sugbo, gibana-bana nga molanat ngadto sa kapin sa usa ka oras o duha ang biyahe.
Sa kadtong way pribadong kasakyan adunay mga van for hire sa SM terminal o Ayala terminal lahos sa Tuburan.
Pag-abot sa población area, adunay mga habalhabal nga inyong kasakyan patungas sa 360 View Café.
Sa higayon nga masaag, di maguol tungod kay ang mga local maabi-abihon nga mohatag kaninyo og direksiyon.
Aron sa pagsiguro, mahimong magpalaban sa navigational apps nga magtultol ninyo sa direksiyon, apan adunay mga lugar nga hinay ang mobile phone signal.