SA usa nako ka column, akong gihisgutan ang usa ko ka higala nga ‘ungo’ og folding bikes nga si Jay Garganera sa Brgy. Tinago.
Karon, naa sab koy laing higala nga ungo ug collector sab og mga biseklita. Siya ug ang higala namo nga si Titoy maoy nag-expose nako og una sa folding bikes. Siya mao si architect Rey “Ebok” Rosal.
Sayo ning tuiga, sa akong nahinumdoman samtang nag-estorya mi atol sa “Bike for Hope,” duna siyay siyam ka mga folding bike. Apan paglabay sa pipila ka mga buwan, na shock na lang ko nga nabalhin ang iyang atensyon, gikan sa folding bikes, ngadto na sa vintage kun karaan nga mga biseklita.
Human sa pagbaligya niya sa pipila niya ka folding bikes, nabinlan na lang siya og lima.
“I’m not exclusively collecting folding bikes. Lately, I was hooked with vintage bikes. Karon, I have five folding bikes only for personal use. Giulian na ang uban sa akong mga amigo. I have around 15 vintage bikes at present. Wa pa modagan ang uban kay wa koy oras mohikap,” matod ni Bai Rey.
Imagine, nagsugod lang siyag kolekta ug palit og bikes niadto lang sa miaging tuig. “I started collecting folding bikes summer of 2009. Although I have a mountain bike already before that, “ dugang pa niya. Karon ingon na niana ka daghan.
Wa pa gyud ko makalimot nga iya ming gidala sa usa ka bodega sa mga folding bike sa Mandaue City nga di nimo mailhan nga tindahan diay og surplus bikes. Ingon niana siya ka maayo mangita og sources sa surplus bikes.
Nakugang pa gyud ko makausa ka higayon dihang samtang nagbiseklita mi gikan sa Liloan, diin iyang gigamit ang iyang Dahon nga folding bike, kalit lang siya misutoy. Kaingon nakog nakigluma siya sa usa ka tiguwang nga lay minister nga nagsakay sa iyang cruiser bike. Kanang karaan nga biseklita nga usahay kargahan og tuba. Tagsa na lang kaayo ang nagdagan og ingon niana.
Mao diay nga misutoy lang ang akong amigo kay iyang gigukod si Manoy aron unta paliton niya ang biseklita. Apan wa gyud mosugot ang tag-iya kay iyang gigamit sa pagsaka sa kabukiran.
Kadto sab maoy pagsugod ni Rey sa pagkolekta og ‘balloon’ nga biseklita. Kahibawo kag pila na ka buok ang iyang biseklita nga cruiser? Moabot na og 15. Sa atoa pa, duna siyay di mominos 20 ka mga biseklita kon atong iphon og apil ang iyang mountainbike.
Wa kaha masuko ang iyang asawa? “At first wala (asawa). Kuyog man gani mi when I get my first “Dahon“ folding bike. Later, nasuko kay naghuot na sa balay. But lately, wala na masuko. Wa na man siya kakita sa ako gipamalit. Tua sa pikas balay. Hehe!” (Katultol ko ini kay pareho man mig dapit gipuy-an kaniadto apan nibalhin na man ning akong amigo og puyo.)
Gawas sa pagkolekta, iya sab nga gibag-o paghinayhinay ang mga biseklita. “Yes. Restoring a bike is fun, bisag makadlawnan pa sigeg hapuhap sa bike, di ka katugon. Di ka kabantay sa oras. That’s why bike enthusiasts are called ‘ungo’.” Sakto gyud, maorag ungo kay makalingaw man.
Komedya pa ni Jay namo samtang nag-estorya mi parte ni Rey. “ Kana si Ebok kuyaw kaayo. Kon ang ubang mga lalake gibalay ang mga babaye, iyaha lahi. Mga biseklita,” dayong bahakhak og katawa.
Bitaw, unsaon gud nang 20 ka biseklita? Mao nay ungo nga collector.