Vallena: Defensive driving

SA AKOANG pagbahasbahas sakay sa akong scooter kagahapon, Sabado, labing minos tulo ka mga aksidente sa motorsiklo ang akong naagian sa dalan. Wa say adlaw nga di ko makaagi og aksidente sa motorsiklo. Labing minos duha.

Nganong ingon man niani ang kanunay mahitabo sa dan? Kay daghan sa mga nagmotorsiklo ang way seminar sa unsa ang hustong pagmaneho aron makalikay sa disgrasya. Naa say uban nga grabe ra kaayong kompyansa.

Kon magmaneho gud ka, gikinahanglan ang defensive nga pagpadagan. Kana bang magmatngon ka pinaagi sa pagtan-aw sa atubangan, duha ka mga kilid ug likod. Gikinahanglan usab nga mag-anticipate kanunay. Kana bang magbantay ka nga kalit nga mohunong ang sakyanan nga naa sa imong atubangan o moliko lang og kalit.

Magsunod ka gani og sakyanan, bantayi ang gikusgon sa imong dagan ug maintain og igong distansya. Alang nako, ang gilay-on nga mga duha ka sakyanan maoy labing luwas nga gilay-on samtang magdagan ka. Mas epektibo ni kay sa 3-second rule. Kon ang tanang mga tawo ingon niani lang, hayan makuhaan og 30-50 porsyento ang mga aksidente sa dalan nga naglambigit sa two-wheeled nga mga sakyanan.

Nakadumbol

Usa niana ka buntag, akong naagian ang batan-ong lalake nga maorag kahilakon nga nakigsulti sa tag-iya sa usa ka sakyanan nga iyang nadumbolan. Klaro nga siya ang sad-an kay siya ang nakadumbol.

Diha say higayon nga padung ko mosimba sa Mabolo, ang simbahan diin ko gibunyagan.

Naagian ko sa usa ka utility vehicle nga naghaguros ang dagan dihang nahatungod ko sa University of San Carlos-Technological Center. Grabe nga nakakuros-kuros sa pagpadagan ang drayber. Ako nang gihimadlan nga dako og purohan nga maaksidente ni.

Tuod man, pag-abot sa sakyanan sa may Country Club, nabangga ang usa ka motorsiklo. Diha silang duha sa akoang atubangan. Nihaguros ang motorsiklo nga ni-overtake nako. Ang AUV nga nag-una, kalit nga mibalik sa inner lane.

Sa kakusog sa dagan sa motorsiklo, wa na madala sa iyang brake, nabangga ni. Nakasiyagit ang drayber sa ka sakit. Kon akoy pasultihon, sad-an ang duha.

Malikayan

Kadto nga aksidente malikayan unta kon ang duha ka mga drayber wa pa maghinanggaw sa ilang pagpadagan. Ang drayber sa motorsiklo, grabe nakapadagan. Ang akong speed 50 kilometers per hour nga maximum. Kay naghaguros man siya,sa akong bana-bana naa siya sa labing minos 70 kph.

Ang drayber sa AUV, nagsige sab og taboktabok og lane nga di unta angay nga buhaton. Unsaon, nagsige man og overtake sa mga sakyanan nga maapsan sa driver.

Dinhi, imong makita nga dako ang kahigayunan nga malikayan ang aksidente pinaagi sa defensive driving.

Related Stories

No stories found.
SunStar Publishing Inc.
www.sunstar.com.ph