Pormal nga nihangyo si outgoing Cebu City Councilor Rey Gealon sa Office of the Mayor nga maghimo og task force aron imbestigahon ug i-nullify ang assessments sa buhis sa real property nga giingong giisyu pinaagi sa "AS400 stamp override scheme."
Ang gisugyot nga task force maglangkob sa mga representante gikan sa City Assessor’s Office, City Treasurer’s Office, ug City Legal Office.
Nanawagan usab si Gealon sa Human Resource and Development Office nga mag-isyu og mga pahibalo sa hingtungdan nga mga empleyado, ug giawhag ang ilang kooperasyon sa imbestigasyon ug ang ilang kaandam nga moserbisyo isip mga saksi sa korte kon gikinahanglan.
Sa usa ka privilege speech niadtong Miyerkules, Hunyo 25, 2025, gipadayag ni Gealon ang iyang kaguol sa investigative reports nga gihimo sa City Legal Office.
Matod niya nga nakugang siya sa findings nga nagpakita nga ang market values nisaka og 700 porsiyento, diin ang uban niabot pa gani sa 3,200 porsiyento, tanan giingong "walay due process."
Ang AS400 usa ka lig-on nga midrange computer system nga gimugna sa IBM niadtong 1988 nga nailhan tungod sa kasaligan ug seguridad niini sa pagdumala sa mga aplikasyon sa negosyo.
"Checks and balances ignored, and voices of question were silenced all in the name of fiscal targets," matod ni Gealon.
Gihatagan og gibug-aton ni Gealon ang epekto niining kalit nga pagtaas sa buhis sa tawo ug gitataw niya nga sa matag buhis nga gipahamtang, anaa ang pamilya, gagmay nga negosyo, retirado, ug uban pa.
"These sudden increases mean a difference between security and uncertainty, between hope and despair," batbat ni Gealon.
Nagpasida-an si Gealon sa posibleng sangputanan sa dili paghimog lakang kabahin niini.
"If we allow irregularity to fester, if we turn a blind eye to the suffering of our constituency, then we betray not just our very oaths, but the very soul of our city,” dugang ni Gealon.
Isip usa ka manugluwat nga konsehal, nanawagan si Gealon sa umaabot nga konseho nga sigurohon nga ang tanang umaabot nga tax measures nahisubay sa balaod, sa due process, ug matinud-anong konsultasyon sa publiko.
Gilambigit ni Gealon ang iyang panawagan sa naobserbahang mga iregularidad sa dinagko nga pagtaas sa market values sa mga deklarasyon sa buhis sa real property. / JPS