Walay nakitang foul play ang Mabolo Police Station sa nahitabong paglayat sa usa ka abogada nga taga dakbayan sa Lapu-Lapu sa 16th floor sa FLB Corporate Center Building, Bohol St., Cebu Business Park, Barangay Luz, dakbayan sa Sugbo, pasado alas 2 sa hapon, niadtong Biyernes, Septiyembre 20, 2024.
Matod ni Police Major Romeo Caacoy, hepe sa Mabolo Police Station, nga duna silay saksi gikan sa 17th floor nga nakakita sa biktima nga migawas sa balkonahe sa ilang opisina ug midiretso kini sa paglayat ug walay laing tawo nga nagtukmod niini.
Bisan unsaon nila matod pa sa pag singgit nga dili buhaton ang paglayat wala na kini maminaw ug maglisud na sila sa pagpugong tungod kay naa sila sa ika 17 nga andana.
"Naa mi nakuha nga witness nga nakakita gyud sila sa paglayat sa biktima nga walay laing tawo nga naghimo," matod ni Caacoy.
Sa ilang pagkuha’g impormasyon sa pamilya sa biktima ilang gibutyag nga naghambin og personal nga problema ang abogada nga maoy nagtukmod niini nga maghunos sa iyang kaugalingon’g kinabuhi.
Wala na modetalye pa si Caacoy kung unsa nga matang sa problema sanglit wala siya tugoti sa pamilya nga nagbangutan nga mopahibawo niini sa publiko nga iya usab nga gi respeto.
Ang maong abogada nga usa usab ka Certified Public Accountant niadtong 2022 lang nakapasar sa Bar Examination.
Tambag sa kapulisan sa mga tawo nga naghambin og daku nga problema sa kinabuhi ug nakasinati na og depression nga labing maayo nga moduol sa ilang suod nga higala, pamilya o kaha sa mga religious groups aron mahatagan kinig tambag.
Dili kini angayan nga tagoan aron di mosangpot sa di maayong desisyon sa kinahuhi.
Mamahimo sad matod pa nga modangop sila sa kapulisan sanglit duna silay unit nga ang mga personnel niini batid sa paghawid sa maong matang sa problema. / AYB