‘Kamote rider’ gipatawag sa LTO

Molusad og imbestigasyon ang Land Transportation Office (LTO) Region 7 human mopagawas og Show Cause Order batok sa usa ka babaye nga giila nga si Debbie Marie Amores Juit, ang rehistradong tag-iya sa usa ka Honda nga motorsiklo nga nag-viral sa social media ang iyang video nga naghimo og delikado nga mga stunt sa busy nga highway sa Mandaue City.

Ang makapaalarma nga insidente, nahitabo niadtong Hunyo 12, 2025, nga nikaylap online.

Sa nag-viral nga footage, ang babaye naghimo og sunod-sunod nga kuyaw kaayo nga mga maniubra samtang nagmaneho sa iyang motorsiklo taliwala sa daghang trapiko.

Naglakip kini sa pagbuhi sa manobela, nag-drive pinakilid, ug nisayaw samtang gadagan ang motor.

Ang gihimo ni Juit dili lang nakahatag og peligro sa iyang kaugalingon apan apil na sa ubang mga motorista.

Dali nga niresponde si LTO Region 7 Director Glen G. Galario sa mga saway sa publiko.

Niadtong Hunyo 13, 2025, iyang giisyu ang Show Cause Order nga nagmando kang Juit nga moatubang sa LTO 7 Operations Division sa N. Bacalso Avenue, Cebu City.

Gikinahanglan siya nga mosumiter og sinuwat nga katin-awan sa iyang gibuhat nga gihulagway nga paglapas sa Seksyon 48 ubos sa Republic Act 4136, o "Reckless Driving".

"This incident represents a clear violation of traffic laws and a serious threat to public safety. The rider endangered not only herself but also other motorists on the road through her reckless behavior," matod ni Galario.

Giapahinumdoman ni Gala­rio ang tanang motorista nga unahon ang kaluwasan diha sa dalan sa tanang panahon. / PR