Giawhag ang Kagamhanan sa Dakbayan sa Sugbo sa pagpahingusog sa ilang paningkamot batok sa teenage pregnancy sa lokalidad.
Si Konsehal Rey Gealon, nangamahan sa resolusyon, niingon nga ang pagkombati sa teenage pregnancy adunay lapad nga sosyal, ekonomikanhon, ug edukasyonal nga implikasyon lapas pa sa panglawas.
Ang resolusyon, nga gipasar atol sa regular session sa Konseho niadtong Miyerkules, Hulyo 10, 2024, nag-awhag kang Acting Mayor Raymond Alvin Garcia sa paghangyo sa Commission on Population and Development (CPD) sa pagpalig-on sa mga inisyatiba niini sa dakbayan sa Sugbo.
Ang programa sa CPD nagtumong sa pagpauswag sa mga reproductive health services, pagdugang sa mga paningkamot batok sa sekswal nga pag-abuso, pagsulbad sa mga hagit sa socio-economic, ug pagdasig sa partisipasyon sa komunidad pinaagi sa mga kalihukan sa barangay.
Si Konsehal Jose Lorenzo Abellanosa nidugang og mga corollary motion nga naghangyo sa CPD sa pagmonitor ug pagtimbangtimbang sa kaepektibo sa mga inisyatiba ug sa pag-apil sa Department of Health ug Department of Education niining gipakusog nga mga paningkamot.
Ang SunStar Cebu nitaho niadtong Pebrero 12, 2024, nga ang Dakbayan sa Sugbo nitala og 1,504 ka kaso sa teenage pregnancy niadtong 2022.
Sa 80 ka barangay sa dakbayan, ang Inayawan ug Mambaling ang giila nga mga dapit nga adunay labing daghang mga kaso sa teenage pregnancy niadtong 2022, nga adunay 80 ka kaso matag usa./ JPS with GrezelBalbutin, VSU INTERN