Hingpit nga gidili ang pagsul-ob og campaign t-shirts, online campaigning ug pag-host sa bisan unsa nga kalihukan atol sa pagsaulog sa Huwebes Santo, Abril 17, ug Biyernes Santo, Abril 18, 2025.
Matod ni Comelec Regional Director Francisco Pobe, posibleng mag-atubang og kasong election offense ang mga kandidato nga masakpang nakalapas sa maong lagda.
“If masakpan, they may face violations either under the standard amount of election offense or be subjected to disqualification proceedings,” matod ni Pobe.
Ang pagdili mo-apply sa tanan’g matang sa pagpangampanya bisan sa personal o online lakip ang pagsul-ob og mga campaign merchandise, promosyon sa social media, ug pag-organisar sa bisan unsang mga kalihukan nga may kalabotan sa kampanya.
Ang mga makalapas mahimong silotan ubos sa Seksyon 263 ug 264 sa Omnibus Election Code nga naglakip sa posibleng multa, pagkabilanggo, o pagkadiskwalipika sa paghupot og katungdanan sa gobiyerno.
Matod ni Pobe nga ang maong restriksyon maoy kabahin sa ilang paningkamot nga mapreserbar ang kasagrado sa Semana Santa dungan sa pagmintinar sa kaangayan ug kahapsay sa panahon sa eleksyon.
Ang Comelec Resolution No. 11086 nagtakda sa mga guidelines alang sa Republic Act No. 9006 o ang Fair Elections Act.
Giklaro ni Pobe nga mahimong ipadayon sa mga kandidato ang ilang mga kalihukan sa kampanya sugod sa Black Saturday hangtod matapos ang campaign period, basta motuman lang sila sa mga regulasyon sa Comelec.
Padayon’g giawhag ni Pobe ang tanang kandidato ug ang ilang mga dumadapig nga higpit nga tumanon ang maong mga petsa, dili lang sa pagtuman sa balaod, kondili pagpakita og pagtahod sa relihiyusong tradisyon ug alang sa solemnidad sa pag-obserbar sa Semana Santa 2025. / CAV