Pormal nga niduso ang kampo ni Cebu Governor-elect Pamela ‘Pam’ Baricuatro sa tubag niini nunot sa giatubang nga disqualification case sa Commission on Elections (Comelec).
Kini giduso sa kampo ni Baricuatro pinangulohan ni Atty. Ferdinand Topacio sa Hunyo 19, 2025 bisan og giingong wala sila makadawat sa opisyal nga summon gikan sa Comelec.
Ang naasoy nga disqualification case gipasaka sa usa ka Katrina Kaye Kowalik, usa ka rehistradong botante sa Lalawigan sa Sugbo ug maoy nagdala kaniadto sa Sugbo News.
Lakip sa rason sa disqualification case mao ang giingong kalapasan sa “Section 5, in relation to Section 3 of Fair Election Act (RA 9006) as implemented by Comelec Resolution Nos. 11086 and 11117.”
Gawas sa maong kaso, lakip sa giampo niini ang pagpugong sa pagpanumpa ni Baricuatro sa katungdanan.
Sa 21 ka pahina sa gidusong tubag, giingong late ug sayop ang opisina diin giduso ang naasoyng petition.
Ubos sa Rule 25, Sc. 2 sa Comelec Resolution No 9523, kinahanglan nga iduso ang petition sa Law Department sa Comelec ug isumiter kini human sa uwahing adlaw sa filing sa certificates of candidacy “but not later than the date of proclamation.”
Giingong napakyas usab kini sa pag-comply sa lagda sa pagsunod sa electronic filing sa service pleadings ug uban pa’ng mga dokumento.
Gihimug-atan usab sa kampo ni Baricuatro nga wala usab sila makadawat og kopya sa petition bisan sa personal o diha man sa electronic mail.
Nagtuo usab kini nga sagol pamolitika ug walay igo ug legal nga basehan ang pasangil batok ni Baricuatro hinungdan nga gitinguha nila ang pagpa- dismiss sa naasoyng kaso.
Sa nasayran, si Baricuatro manumpa na sa katungdanan sa Hunyo 30, 2025 sa Cebu Provincial Capitol human kini nakakuha og moabot sa 1,107,924 nga botos sa milabayng piniliay sa Mayo. / ANV