Gitrabaho na karon sa legal team ni Vice President Sara Duterte ang pagtubag niini sa mga summon nga giisyu sa Senate Impeachment Court karon nga gi-pressure na kini nga pormal nga tubagon ang mga kaso batok kaniya.
“Pinag-uusapan na rin ngayon kung paano nila gagawin yung pag comply sa summons ng Senate,” matod ni Duterte dihang nahinabi sa mga tigbalita niadtong Hunyo 12, 2025 sa Kuala Lumpur, Malaysia.
Gikumpirmar usab sa Office of the Vice President (OVP) nga nadawat nila ang mga summon niadtong Hunyo 11 nga gihatod sa Senate sergeant-at-arms sa OVP office sa Mandaluyong City.
Ang mga summon nagmando kang Duterte sa pagsumiter sa iyang opisyal nga tubag sa mga artikulo sa impeachment sulod sa 10 ka adlaw, dili kini mamahimo nga ma-extend nga panahon.
Kini nagkinahanglan usab kaniya sa pagtunga sa Senate Session Hall sa Pasay City ug sa pagsunod sa bisan unsang mga mando, direksyon, ug mga desisyon nga giisyu sa Senado nga naglingkod isip impeachment court, ubos sa awtoridad sa Konstitusyon sa Pilipinas ug mga may kalabutan nga balaod.
Sa sayo pa, si Senador Ronald “Bato” Dela Rosa miingon nga ang Senado nagpaabot sa aksyon gikan sa House of Representatives human gibalik ang mga artikulo sa impeachment tungod sa mga namatikdan nga dili pagkaparehas.
Mipahimangno pa si Dela Rosa batok sa pagdalidali sa trial, nga nag-ingon nga gipasidan-an sa Senado ang mga isyu sa konstitusyon nga kinahanglan katin-awan sa dili pa mopadayon.
Niadtong Hunyo 10, 18 ka senador ang mibotar nga nagmando sa Kongreso nga kumpirmahon nga wala kini nakalapas sa Konstitusyon sa dihang gihisgutan niini ang tulo ka naunang mga reklamo sa impeachment sa wala pa nila botari ang kaso batok Duterte.
Hunyo 11, nituman ang Kongreso ug nipasar og resolusyon nga nagpamatuod nga ang proseso sa impeachment batok kang Duterte nasubay sa mga kinahanglanon sa konstitusyon, lakip na kon giunsa pagdumala ang naunang mga reklamo.
Kahinumduman nga gi-impeach sa Kongreso si Bise Presidente Duterte niadtong Pebrero 2025 tungod sa mga alegasyon sa graft, korapsyon, ug sa iyang giingong pagkalambigit sa usa ka laraw sa pagpatay kang Presidente Ferdinand “Bongbong” Marcos Jr., kang First Lady, sa House Speaker. / RGP