Gilamoy sa kayo ang iladong “lugawan” nga kan-anan nga nahimutang sa public market sa Barangay Poblacion, Dakbayan sa Lapu-Lapu, sa Dominggo, Mayo 4, 2025.
Si City Fire District Fire Officer 3 ug case investigator Jopet Obiña nagkanayon atol sa pakighinabi sa SunStar Cebu nga giisa sa first alarm ang sunog nga mikabat sa P72 mil ang danyos sa kabtangan.
Matod ni Obiña, hingpit nga naugdaw sa maong sunog ang usa ka andana nga establisemento nga ginama sa light materials nga gipanag-iya sa usa ka 60 anyos nga babaye nga namaligya og lugaw sa merkado sulod sa kapin upat ka dekada.
Dugang pa niya nga nakan-an usab sa kayo ang tapad nga establisemento, apan wala hinuoy natala nga naangol.
Ang maong insidente nga gialarma sa alas 4:59 sa kaadlawon, nakontrolar sulod sa singko minutos, ug hingpit nga napawong sa alas 5:18 sa buntag.
Ang bana sa biktima misugilon ngadto ni Obiña nga nakakita siya og mga spark sa linya sa kuryente nga nagkutay gikan sa main source sa wala pa mahitabo ang sunog.
Hinuon, dili pa kini maoy hingpit nga hinungdan, sanglit nagpadayon pa ang kabomberohan sa ilang imbestigasyon.
Si Obiña ug laing duha ka mga bombero nagplano nga makigtagbo sa tag-iya sa kan-anan karon’g adlawa, Lunes, alang sa follow-up investigation.
Samtang sa Dakbayan sa Sugbo, ang mga bombero niresponde sa duha ka alarma sa sunog sa merkado publiko sa Barangay Cogon Ramos ug sa Green Village, Barangay Guadalupe, niadtong Sabado sa hapon, Mayo 3, 2025. / DPC