Usa ka kanhi konsehal sa barangay sa Tangke, dakbayan sa Talisay ang nasikop sa buy-bust sa Provincial Intelligence Unit (PIU) uban sa Provincial Drug Enforcement Unit (PDEU) sa Cebu Police Provincial Office (CPPO) sa Sityo Sambag, Barangay San Roque, Talisay, alas 11:30 sa gabii, Sabado, Enero 6, 2024.
Ang suspetsado giila nga si Romeo Dela Cruz Santillan, Jr. o alyas Junior Santillan, 44, taga sitio Salvador, Tangke sa Talisay.
Nakuha sa mga operatiba ang mga binulto sa gituohang shabu nga motimbang sa 200 gramos nga dunay standard drug price nga P1,360,000 ug drug paraphernalia.
Ang mga sakop sa PIU ug PDEU sa pagpangulo ni Police Lieutenant Francis Russue Salvid ubos sa supervision ni Police Lieutenant Colonel Antonio Ananayo, milusad sa operation gilusad human makadawat og impormasyon labot sa illegal nga negosyo sa kanhi konsehal sa Tangke ug nasuta kini pinaagi sa pagpaniid sa iyang kalihokan.
Samtang, nadakpan sab sa Talisay City Police Station ang duha ka high value individual (HVI) sa Sitio Sunrise, Barangay Pooc, Talisay, alas 9:58 sa gabii sa Huwebes, Enero 4, 2024, nga nakuhaan og 10 gramos nga gituohang shabu.
Ang mga suspek giila nga silang Noel Balorio Resuena, 45, ug taga Sitio Centro Barangay Pooc sa Talisay ug Anabel Abellana Minguito, 41, taga isla sa Barangay Gilutongan, lungsod sa Cordova.
Gawas sa illegal nga drugas, lakip sa nakuha gikan kanila ang usa ka .22 nga kalibre sa armas ug duha ka mga bala niini.
Sa laing bahin, malakip sa target list sa Philippine Drug Enforcement Agency (PDEA) 7, nadakpan sa gilusad nga buy-bust operation uban sa Naval Forces Central ug Talamban Police Station sa Sitio Tawagan 2, Barangay Sirao, dakbayan sa Sugbo, alas 5:45 sa hapon, Biyernes, Enero 5, 2024.
Ang suspetsado giila nga si Venris Jay Bonghanoy, 25, nga molupyo sa maong barangay.
Nasakmit sa mga operatiba ang duha ka pakete sa gituohang shabu nga motimbang sa 50 grams nga dunay estimated market value nga P340,000 lakip na ang cellular phone niini.
Matod ni Leia Alcantara, information officer sa PDEA 7, nga duha nila ka buwan nga gipaubos sa case build up ang suspetsado human makadawat og impormasyon gikan sa usa ka confidential informant.
Base sa imbestigasyon, nasuta makabaligya ang suspek og 200 gramos matag semana gikan sa iyang supplier.
Kalapasan sa kasong bahin sa gidiling drugas ang giandam na sa PDEA 7 ug kapulisan nga ipasaka batok sa mga dinakpan.