ARON masiguro nga mahatagan og giya sa pagpahimutang sa agrikultura sa Lalawigan sa Sugbo, nakigtambayayong si Cebu Governor-elect Pamela Baricuatro ni kanhi Agriculture Secretary Manny Pinol isip kaabag ug adviser alang sa food security.
Gipakita ni Pinol diha sa iyang social media ang mga hulagway nila ni Baricuatro sa usa ka tigom diin usa sa gihisgutan niini ang food security ug plano aron masiguro nga igo ang pagkaon ug suplay sa lalawigan atol sa pagsugod sa iyang administrasyon.
“Same Dream, Different Domain. Proud & Happy To Help Gov. Pam Baricuatro Turn Cebu Into A Food Sufficient Province. I have accepted her request for me to serve as Cebu’s Food Security Adviser,” matod ni Pinol sa Hunyo 19, 2025.
Samtang si Baricuatro nipadayag sab sa iyang tinguha nga maplastar sab ang agricultural landscape sa probinsiya, aron maabagan ang mga mag-uuma ug mga komudidad.
Nagtuo siya nga dako og ikatabang si Pinol sa lalawigan ilabi na nga gawas sa pagpangisda, ang pagpanguma ug pagpananom maoy panginabuhian sa mga Sugboanon.
“We tackled key issues and opportunities in Cebu’s agricultural landscape—from food security and support for local farmers, to sustainable farming innovations that can uplift rural communities,” matod ni Baricuatro.
Ang Lalawigan sa Sugbo ubos sa pamunoan ni outgoing Cebu Governor Gwendolyn Garcia adunay mga nagkadaiyang programa sama sa Enhanced Countryside Development (ECD) nga mag-abag sab sa mga mag-uuma ug mananagat nga makapadayon sa pagpangita ug makasuplay kini sa panginahanglan dili lang sa Sugbo lakip sa ubang lugar sa nasod.
Apan una na nga gipasabot ni Baricuatro nga ang kasamtangang mga programa usa sa iyang susihon atol sa iyang paglingkod sa kapitolyo sa Hunyo 30, 2025. / ANV