Babaye nga kanhi cashier sa usa kompaniya nga giingong nakadispalko og dakong kantidad sa kwarta nasikop sa mga sakop sa Criminal Investigation and Detection Group-Lapu-Lapu City Field Unit ala 1:40 sa Huwebes sa hapon, Pebrero 15, 2024 sa Hoops Dome, Barangay Gun-ob, Lapu-Lapu City human nalutsan og warrant of arrest sa kasong qualified theft.
Ang akusado giila nga si Chatelyn Marañan Tuling, 25, taga Sitio Fatima, Barangay Cansaga, lungsod sa Consolacion.
Ang CIDG dunay kopya sa warrant of arrest nga giluwatan ni Branch 58 Presiding Judge Ma. Lynna Pacamalan Adviento sa 7th Judicial Region sa dakbayan sa Sugbo batok kang Tuling nga pinetsahan og Pebrero 13, 2024 nga dunay gitugot nga piyansa nga P88,000 alang sa temporaryo nga kagawasan.
Sa miaging tuig, gipasakaan og kaso sa iyang amo ang akusado human nawagtangan sila’g dakong kantidad.