Kanhi manager sa usa ka tourist destination sa Lungsod sa Sikatuna, Probinsiya sa Bohol nga nabutang sa top 2 most wanted person ang nadakpan sa Cebu City Police Office (CCPO) alas 9:20 sa buntag, Biyernes, Hunyo 13, 2025, sa Sitio Tabucanal, Barangay Basak San Nicolas, Dakbayan sa Sugbo sa kasong lima ka ihap sa rape.
Ang nabalhog karon sa temporary custodial facility sa CCPO giila sa alyas nga Ron-Ron, 53, kanhi manager sa usa ka tourist destination sa Lungsod sa Sikatuna.
Ang CCPO ni-serve sa warrant of arrest sa akusado nga giluwatan ni Judge Gleenes Dave Rangga Bantique, ang Presiding Judge sa 7th Judicial Region, RTC Branch 47 sa Dakbayan sa Tagbilaran nga pinetsahan niadtong Hunyo 3, 2025, nga walay gitugot nga piyansa.
Ang nipasaka kaniya og kaso ang usa ka 28-anyos nga babaye nga iyang trabahante isip gardener nga nagpuyo ra sab sa Lungsod sa Sikatuna.
Si alyas Roxanne nagkanayon nga nagsugod siya og trabaho sa tourist destination niadtong Enero 2021 hangtod Nobiyembre 2024.
Pagka Pebrero 8, 2024, sa alas 9 sa gabii sa dihang ang asawa ni alyas Ron-Ron nipauli sa Siyudad sa Sugbo ug samtang nanglimpyo siya sa opisina sa akusado, gitawag siya ug dunay gipatan-aw kaniya nga usa ka bold movie sa cellular phone.
Sa dihang nahuman na niya og limpyo ang opisina sa manager ug padulong na unta siya nga mogawas, gitawag siya og balik ni Ron-Ron ug gipasusi niini ang ilang comfort room (CR) tungod kay matod pa nanimaho kini.
Apan sa dihang naa na siya sa CR nisunod diay ang akusado ug gi-lock ang pultahan niini ug dayong gakos kaniya.
Bisan sa iyang paglugnot wala siya makapiog tungod sa kadako sa lawas niini ug gidali sa akusado paghubo ang iyang mga sapot ug nakighilawas kini kaniya.
Nisuway unta siya sa pagsinggit apan gitabunan sa kamot ang iyang baba dungan sa pagbahad nga tangtangon sa trabaho lakip na ang iyang kaipon nga kauban niya isip gardener.
Tungod kay gikinahanglan niya ang maong trabaho alang sa ilang mga anak, napugos siya sa pagpakahilom.
Ang ikaduhang pugos nga pakighilawas niadtong Marso 2024, nga dili na niya mahinumdoman ang petsa, alas 2:00 sa hapon niabot kini sa iyang area ug sa dihang nabantayan nga walay laing tawo sa palibot gitawag siya ug gibitad pasulod sa barracks ug didto gipahimuslan bisan pa man sa iyang paghangyo nga “Ayaw na sir, nahadlok na ko.”
Nasundan pa kini pagka Abril 2024 sa alas 7 sa gabii sa usa ka lawak ug pagka Mayo 2024, sa alas 12 sa udto gipasulod siya sa Nuptial room ug didto gihimo na sab lawasnong kalipay.
Ang katapusan nga gihilabtan si Roxanne niadtong unang semana sa Hunyo 2024 sa alas 7 sa gabii.
Dinhi na nihukom si Roxanne nga dili na mosugot sa himuon sa akusado ug gisugdan na siya og bikil pinaagi sa kanunay nga pag-isyu og memo-randum pagpa-explain kaniya bisan walay igong rason.
Tungod niini, nakahukom ang biktima nga mo-report sa maong insidente ug ni-resign sa trabaho niadtong Enero 16, 2025, diin pito ka buwan na sab siya nga mabdos ug nipasaka sa kasong kalapasan sa Republic Act 8353 kon pagpanglugos. / AYB