Ang kanhi superstar sa National Basketball Association (NBA) nga si Carmelo Anthony nga karon retirado na, nagsugod og bag-ong career ug mao kini ang usa ka studio analyst para sa NBC Sports.
Gianunsiyo sa NBC kagahapon, Mayo 4, ang ilang pagkuha sa 10-time NBA All-Star ug ika-10 sa NBA all-time scoring list isip parti sa ilang team nga mo-cover sa NBA karong Oktubre.
Si Anthony miretiro human sa mabulokon nga 19 ka tuig nga karera sa NBA diin mibuhat siya og 28,289 career points. Siya ipahiluna sa Basketball Hall of Fame karong Septiyembre.
Sa aktibo pa kini nga miduwa sa NBA, si Anthony apil sa US Team sa upat ka Olympics, diin midaog siya og tulo ka gold medal.
Miretiro si Anthony sa 2022-23 season. / RSC