Nagbangis ang four-time National Basketball Association (NBA) All-Star DeMarcus Cousins ug gikilaw sa Zamboanga Valientes ang Macau Black Bears, 81-65, sa The Asian Tournament grand finals, Agusto 10 sa gabii.
Hapit mag triple-double ang 33-anyos nga si Cousins sa iyang 21 puntos, 13 rebounds ug walo ka assists alang sa Valientes.
Si Cousins maoy nangulo sa hasdang sa Valientes sa third quarter sa wa pa misalida si import Rickey Brice, kinsa mibuhat og 25 team-high puntos ug 10 ka rebounds aron makuha ang Finals MVP award.
Ang bigman nga si Cousins kanhi best player sa Sacramento Kings nga maoy gapili kaniya isip 5th overall pick sa 2010 Draft.
Nagduwa siya ubos sa Kings tuig 2010 ngadto 2017. Human niini, naglayatlayat na kini og team sa NBA: New Orleans Pelicans (2017-2018), Golden State Warriors (2018-2019), Houston Rockets (2020-2021), Los Angeles Clippers (2021), Milwaukee Bucks (2021-2022), ug Denver Nuggets (2022).
Human sa NBA milabang kini sa overseas basketball sa Puerto Rico, Taiwan ug karon sa Pilipinas. / RSC