Gisuwayan sa pagtabang sa mga rescuer sa lungsod sa Moalboal, Cebu ang usa ka kanhi sikat nga Philippine Baskaetball Assciation (PBA) player human nakit-an nga wa nay panimuot sa kasagbutan sa Sityo Cogon, Barangay Basdiot sa naasoy nga lungsod, alas 12:30 sa hapon, Sabado, Agusto 17, 2024
Si Renato Repollo Alforque, 52, minyo, ug taga Barangay Basdiot, Moalboal, napalgang patay na. Sa wala pa siya sa PBA, si Alforque sikat nga magduduwa sa basketball team sa usa ka lokal nga unibersidad.
Ang kapulisan sa Moalboal nakadawat og tawag gikan sa usa ka concerned citizen mahitungod sa usa ka tawo nga wa nay panimuot nga nakit-an sa kasagbutan hinungdan nga daling giadto sa kapulisan ubos sa kamanduan sa ilang hepe nga si P/Capt. Brigido J Paca II uban sa mga sakop sa rescue team sa Moalboal.
Si Alforque daling gidala sa Badian District Hospital apan gideklarar nga dead on arrival sa attending physician, ala 1:05 sa hapon sa samang adlaw.
Sa imbestigasyon, nasayran nga ang biktima dunay 'misunderstanding' sa pamilya hinungdan sa ilang panaglalis sa magtiayon.
Ang biktima nakit-an sa iyang anak babaye nga niadto kini sa kasagbutan nga nagdala og pisi hinungdan sa pagduda nga naghunos kini sa kinabuhi. Nasuta sa kapulisan nga way foul play ang kamatayon sa basketball player. / DVG