Nasikop ang usa ka kanhi polis nga ni-absent without official leave (Awol) sa buy-bust sa mga sakop sa Regional Drug Enforcement Unit (RDEU) 7, alas 9:05 sa gabii, Dominggo, Disyembre 8, 2024, sa dalan M. Oyson Jr., Barangay Sambag 1, Dakbayan sa Sugbo.
Ang nadakpan giila nga si Kenneth Bacalso Yaquit, 40, taga Das Uncronan Lutopan, Dakbayan sa Toledo.
Nakuha sa suspek ang mga pinakete sa gituohang shabu nga motimbang sa 30 gramos nga dunay standard drug price nga P204,000.
Duha ka semana nga gipaubos sa monitoring si Yaquit sa RDEU 7 uban sa Regional Intelligence Unit sa Police Regional Office 7 human nigawas ang iyang pangalan nga nalambigit sa ilegal nga drugas.
Matag semana makabaligya siya og 50 gramos ug ang iyang area sa distribution mao ang Dakbayan sa Sugbo ug Toledo.
Human makuha ang tanang inpormasyon, giplano dayon ang anti-illegal drug operation sa pakig-alayon sa Philippine Drug Enforcement Agency 7 nga niresulta sa pagkasikop niini.
Nasulod sa PNP organization si Yaquit niadtong 2013 apan na-dismiss niadtong 2015 human nga nag-Awol sa serbisyo.
Gituohan nga human nga nag-Awol sa serbisyo, ang maong kanhi polis nalambigit na sa ilegal nga drugas. / AYB