Usa ka drug personality nga nakagawas tungod sa plea bargain, nadakpan pagbalik sa buy-bust sa Brgy. Cangmalalag, lungsod sa Larena, Siquijor alas 11:10 sa buntag sa Huwebes sa buntag, Enero 11, 2024.
Ang suspek giila nga si Gilrose Tangcalagan Jr., 45, mekaniko, taga Barangay Pangi, Siquijor, Siquijor.
Nakuha gikan sa suspek ang duha ka gagmay nga mga pakete sa gituohang shabu nga motimbang og .06 gramos nga mobalor og P408, lakip na ang marked money ug cellular phone niini.
Ang operasyon gihimo sa hiniusang pwersa sa Philippine Drug Enforcement Agency (PDEA 7), mga sakop sa Siquijor Police Provincial Office (SPPO) uban sa Larena Municipal Drug Enforcement Unit.
Matod ni Leia Alcantara, information officer sa PDEA 7, nga niadtong Marso 7, 2023, nadakpan na sa PDEA Siquijor ang maong suspek.
Nakadawat og impormasyon ang PDEA 7 nga ang ilang kanhi dinakpan nibalik sa iyang naandan nga negosyo.
Tungod niini, gipaubos nila sa usa ka semana nga case build up ug nasuta nga tinuod ang kasayuran.
Ang suspek gikatakda nga pasakaan og kasong kalapasan sa Section 5, Article II sa R.A .9165 o Comprehensive Dangerous Drugs Act of 2002.