Kanhi sakop sa Philippine Army nga nagranggo og Corporal uban sa iyang kakunsabo ang nadakpan sa gilusad nga anti-illegal drug operation sa mga sakop sa Provincial Intelligence Unit, Provincial Drug Enforcement Unit sa Bohol Police Provincial Office (BPPO) alas 7:15 sa buntag, Miyerkules sa Purok 1, Barangay Bil-isan, Lungsod sa Panglao, Probinsiya sa Bohol.
Ang mga nadakpan giila nga silang William Guirit, alyas “Liam” 42, kanhi sakop sa Philippine Army apan na-dismissed sa serbisyo nga taga Purok 8, Barangay Poblacion ug Oliver Cuaco, 45, residente sa Barangay Looc, Panglao Bohol.
Nakuha gikan kanila ang dagkong putos sa gituohang shabu nga motimbang sa 80 gramos nga dunay standard drug price nga P544,000 ug mga non-drug items lakip na ang 9mm pistol nga dunay usa ka bala.
Sa imbestigasyon sa PIU sa BPPO nasayran nga si Guirit nasulod sa serbisyo sa pagkasundalo niadtong 2008 apan na-dismissed siya pagka 2016 human malambigit sa ilegal nga drugas.
Giila siya nga high value individual sa Lalawigan sa Bohol diin ang iyang tinubdan sa suplay sa drugas gikan sa usa ka binilanggo sa penal colony nga wala lang ibutyag sa kapulisan kon asa.
Nag-anam kadako ang network ni Guirit ug ang iyang downline mao si Oliver Cuaco ug ang ilang area mao ang halos tibuok first district sa Bohol ilabi na ang isla sa Panglao.
Giingong makabaligya siya og 100 gramos matag semana nga iyang ipanghagbong sa iyang mga drug pusher sa matag lungsod sa unang distrito.
Kalapasan sa Section 5, in relation sa section 26(b) ug 11 of Article II Republic Act 9165 ug Republic Act 10591 ang ipasaka sa Bohol PNP batok sa duha ka mga suspek.
Samtang dul-an sa usa ka milyon ka pesos nga balor sa ilegal nga drugas ang nasakmit sa mga sakop sa PNP Drug Enforcement Group atol sa buy-bust alas 12:58 sa hapon, Martes, Hulyo 29, 2025, sa Visitacion Extension Street, Sitio SNCA, Barangay Sambag 2, Dakbayan sa Sugbo.
Ang nadakpan giila nga si Januario Dimol Heredia alyas “Jano”, 36, nga taga Sitio Tac-an, Barangay Talamban.
Nakuha gikan kaniya ang mga pinutos sa gituohang shabu nga motimbang sa 125 gramos nga dunay standard drug price nga P850,000. / AYB