Usa ka kanhi seaman ug iyang konsabo ang nadakpan sa buy-bust sa mga sakop City Drug Enforcement Unit sa Cebu City Police Office (CCPO), ala 1:40 sa Dominggo sa kaadlawon, Hunyo 9, 2024, sa sulod sa Ludo Cemetery, Barangay Carreta, siyudad sa Sugbo.
Ang mga nadakpan giila nga silang alyas Janjan, 40, lumad nga taga Sitio Acacia, Barangay Vito, dakbayan sa Sagay, Negros Occidental nga maoy target sa operasyon.
Lakip sa nadakpan si alyas Cathy, 33, nagtrabaho sa usa ka printing press isip production worker, taga Sitio Quijano Compound, Barangay Calamba, dakbayan sa Sugbo.
Nakuha sa mga operatiba sa City Drug Enforcement Unit (CDEU) sa pagpangulo ni Police Major Jonathan Bethooven Taneo ubos sa supervision ni Police Colonel Ireneo Dalogdog, hepe sa kapulisan sa dakbayan sa Sugbo, ang mga binulto nga gituohang shabu nga motimbang sa 1,015.00 gramos nga dunay standard drug price nga P6.9 milyones.
Ang maong mga ebidensya nga nakuha gi-turn over kini dayon sa Philippine National Police (PNP) Forensic Unit 7 alang sa chemical analysis.
Usa sa mga opisyal sa CDEU nga dili magpaila, nagkanayon nga sa imbestigasyon sa kapulisan sa dakbayan sa Sugbo nga kanhi seaman si alyas Janjan apan mihunong niadtong panahon sa pandemic.
Tungod niini, nagkanunanayan na kini nga mobiyahe sa dakbayan sa Sugbo aron mamalit og illegal nga drugas sa Barangay Carreta.
Human ma-monitor ang iyang illegal nga kalihukan, gilusad dayon ang buy-bust operation diin ang mitunol sa illegal nga drugas mao si alyas Cathy.
Kalapasan sa Section 5, Article II sa Republic Act 9165 ang atubangon nga kaso sa duha ka mga dinakpan. / AYB