Nag-wild ang usa ka langyaw human gibihag iyang manok sa Lunes sa hapon, Hunyo 16, 2025, sa buwangan sa Barangay Tabunok, Dakbayan sa Talisay.
Si alyas “Donald”, 65, American national, nagpuyo sa Dakbayan sa Naga gidakop ug gitugyan sa kapulisan.
Ang mga trabahante sa buwangan nireklamo human sa pagpanghasi sa langyaw.
Matod ni Police Lt. Col. Maila Maramag, hepe sa Talisay City Police Station nga nakatulog sa prisohan ang langyaw human siya gipaubos sa citizen arrest dihang gi-turnover sa kapulisan.
Nanari ang langyaw ug gipustahan og P30,000 ang iyang manok apan way suwerte kay gibihag. Giingong wa makadawat ang langyaw sa iyang kapildihan, gituok ang kuymi o sentinsiyador sa tari.
Nagkaguliyang pagsamot kay giguba sa langyaw ang pultahan sa roydahan ug ang uban pang butang sa buwangan.
Hinuon wala na madayon ang pagpasaka og kasong malicious mischief kay nagkasabot ra kini sa tag-iya sa buwangan. / GPL