Kano nalumos sa Moalboal

Usa ka American natio­nal nga naligo sa Basdaku beach sa Barangay Saavedra, lungsod sa Moalboal, unang gikataho nga mis­sing sa alas 3:40 sa hapon sa Sabado, Abril 27, apan nakaplagan nga patay na nga milutaw pagka alas 6:00 sa buntag sa Dominggo, Abril 28, 2024.

Si Edward Hickman Jr., 65, minyo sa usa ka Cebuana, ug taga Barangay Langtad, dakbayan sa Naga giingong nakai­nom dihang naligo sa dagat sumala sa iyang asawa nga si Mylene.

Usa ka mananagat nga taga lungsod sa Guihulngan, Neg­ros Oriental nga si Marte I­go­­gan maoy nakabangal sa lawas ni Hickman sa lawod sa Brgy. Tuble, Moalboal.

Dali niya kining gipahibalo sa Moalboal Municipal Police Station hinungdan nga giadtoan og team ubos sa pagpangulo sa ilang hepe nga si P/Capt. Claudio Gako ug nasuta nga kini ang gikatahong mis­sing nga American national.

Matod pa, nakainom og i­limnong makahubog ang maong langyaw nga nisawom sa dagat ug wala na motunga hinungdan nga gipangita sa kapulisan uban sa mga sakop sa Philippine Coast Guard apan wala nila makit-i hangtod nga nakaplagan kini sa usa ka mananagat.

Ang lawas sa maong Ameri­kano nga naglutaw, gikuha sa lawod sa Scene of the Crime Operatives (Soco) team sa Philip­pine National Police (PNP) ug gikatakda nga ipa-autopsy aron pagsuta kon wala bay foul play sa kamatayon niini. / DVG