Kapin sa usa ka libo ang nadakpan sa kapulisan sa Central Visayas sulod sa usa ka adlaw nga operasyon batok kriminalidad ug pagpatuman sa mga lokal nga ordinansa sa matag lungsod ug siyudad gikan sa Oktubre 5-6, 2024.
Sa ilang kampanya batok illegal nga drugas, nakasakmit ang Police Regional Office (PRO) 7 og 130.20 gramos nga gituohang shabu nga dunay standard drug price nga P885,360 atol sa 20 ka anti-illegal drug operations ug pagkasikop sa 27 ka drug personalities.
Nakalusad usab og 14 ka operations batok sa illegal gambling ang kapulisan nga misikop sa 21 ka mga sugarol, 14 kanila ang napasakaan na kaso sa korte, ug pagkasakmit sa P1,685 nga cash.
Wala mohunong ang kapulisan sa ilang kampanya batok loose firearms subay sa kamandoan sa ilang ulohang buhatan tungod sa nagkaduol na ang midterm elections sa sunod tuig diin tulo ka armas nga walay lisensya, ang ilang naimbargo ug usa ka tawo ang nadakpan og napasakaan na ang kaso sa korte.
Nakadakop usab og siyam ka wanted persons ang kapulisan nga dunay mga pending warrant of arrest sa nagkalainlaing kaso nga giatubang, usa niiini nabutang sa listahan sa most wanted persons.
Samtang, moabot sa P538,010 ang nakolekta sa kapulisan isip multa nunot sa subsob nga pagpatuman sa mga lokal nga ordinansa sa matag lungsod ug siyudad diin 1,116 ka mga tawo ang nadakpan. / AYB